Parlamentario Roco Tjon a bishita DIP DIP: mester por coopera cu Aruba su desaroyo economico por lanta bek

Parlamentario Rocco Tjon hunto cu presidente di parlamento Ady Thijsen a haci un bishita di trabao na Departamento di Infrastructura y Planning (DIP), e bishita na DIP ta algo cu e parlamentario ta bin ta haciendo constantemente.

Sinembargo e bishita di trabao no ta solamente na DIP, Algun tempo pasa parlamentario Tjon a haci bishita na WEB ,Elmar y tambe diferente departamentonan manera Brandweer, Guarda nos Costa. E bishita na DIP ta debi cu nan como parlamentario a keda acerca dor di diferente persona pa loke ta trata e aspecto di huurgrond. P’esey mes a haci e bishita pa mira con e proseso ta canando.

E reunion na DIP a bay den bon ambiente cu sr. Jansen y sr. Maduro unda cu nan a splica con nan ta trata e peticionnan na e momentonan aki. Esunnan concerni ta tratando di pone na ordo e retraso cu tin actualmente y trata cada caso un pa un manera nan mester keda trata. Durante di COVID-19 tin alrededor di 900 peticion a keda haci, pero for di e 900 peticionnan aki 400 peticion a keda atendi, Segun Tjon dentro di poco e otro peticionnan cu tin lo keda atendi tambe.

Tur esunnan cu a haci un peticion lo haya un yamada di e departamento di DIP pa asina sa con nan peticion ta canando. Banda di esaki recientemente tabatin un encuentro publico riba con e desaroyo na Aruba ta canando pero prinsipalmente e desaroyo na San Nicolas.

Parlamentario Rocco Tjon ta duna di conoce cu e la ricibi un presentacion amplio di un peticion cu presidente di parlamento Ady Thijsen a inicia algun luna atras pa loke ta e desaroyo specifico na Savaneta. Ambos parlamentario a haya un bista hopi bunita cu dentro di poco tambe lo keda presenta specificamente pa e area di Savaneta.

E reunion na DIP tabata un reunion sumamente fructifero y positivo segun e parlamentario. Den comunidad mes tin hopi keho riba e terenonan di huurgrond unda cu hopi peticion ta keda haci y tambe pa prolongacion di e pida tereno cu nan tin caba pa planta. E tipo di peticionnan pa planta ta e peticionnan cu ta keda atendi mas lihe. Pero porehempel tambe tin personanan cu a haci peticion pa extension patras di nan cas pa nan por planta, segun parlamentario Rocco Tjon esakinan ta peticionnan cu mester analisa mas di cerca cu tambe tin e atencion di e departamento.

Sinembargo loke cu ta un realidad caso Avestruz y caso Flamingo a haci efecto den DIP, pero investigacion ta andando y ta laga e investigacion cana su caminda y no a atende e topico debi cu ta laga ministerio publico haci su trabao.

Tin Peticionnan pa haya tereno pa agricultura ,plantamento cu tin atencion di DIP. Pero tambe tin peticion pa tereno comercial pero mirando cu Aruba ta memei di un pandemia desaroyo economico ta sumamente importante y cu ta procesonan cu obviamente teniendo cuenta cu tur regla cu aspectonan di integridad y transparencia mester haya su atencion.

Tin diferente persona a haci peticion pa un tereno comercial unda cu nan tin nan carta di garantia di banco cu nan por inverti. Segun Tjon si e tereno ta disponibel ta kere cu e ta na su luga pa hefe di departamento di DIP coopera cu Aruba pa e desaroyo economico por lanta bek.