Diamars ultimo unanimamente Parlamento di Aruba a aproba e fondonan necesario pa e “sociaal crisisplan”. Manera ta conoci e plan aki tawata necesario door cu Gabinete Eman a neglisha e departamentonan social pa hopi aña. Den su totalidad a corta alrededor di 70 miyon florin durante e 8 añanan di Gabinete Eman. E meta di e plan actual, cu a florece bou Minister Glenbert Croes, ta pa atende cu e diferente problemanan social na un forma integral, eficiente y eficaz.

Sociaal Crisisplan 2020 – 2030.
Na 2018 e “interim begrotingsfonds Sociaal Crisisplan Aruba” a wordo aproba y e lo continua te cu 31 di december 2021. Sinembargo fraccion di MEP a entrega un mocion pa percura pa Gobierno presenta un plan di maneho pa atende cu e problemanan social pa e proximo 10 añanan. Asina lo por garantisa, despues cu aprob’e atraves di Parlamento, cu futuro Gobiernonan no por neglisha e departamentonan social mas, manera cu Gabinete Eman a haci.

E importancia pa prolonga e sociaal crisiplan tin di haber tambe cu e metanan sostenibel (SDG-goals). Diferente di e metanan sostenibel ta compatibel cu e retonan cu e sociaal crisisplan ta atende cune. Di otro banda Gabinete Wever-Croes a percura pa prome biaha e presupuesto di pais Aruba tin tur e metanan sostenibel ancra den dje.

Prisoners Adminsration System pa KIA.
Durante e reunion publico, Parlamentario Rocco Tjon MBA, a enfoca riba KIA y e importancia pa inverti den e “jeugdafdeling” y tambe pa adkiri un “prisoners administration system”. Esaki ta puntonan cu a wordo treci pa dilanti for di 2018 caba door di Parlamentario Tjon.

Minister a splica cu atraves di palabracionnan haci cu Hulanda e aña aki e “prisoners administration system” lo bira un realidad. Manera Tjon a indica esaki ta necesario pa por garantisa un trayecto di reintegracion exitoso di e detenido. Y di e forma aki baha recidivismo.

Pa conclui.
Nos ta wak bek riba un bon reunion, den cual un biaha mas Minister Glenbert Croes a haya sosten unanime di Parlamento di Aruba. Esaki ta muestra cu tur partido ta reconoce e trabou grandi cu Minister Glenbert Croes a bin ta haci e ultimo 2 añanan aki. Dentro di poco lo bay tin mas reunion cu Minister di Husticia tambe riba e diferente proyectonan dentro di e sociaal crisiplan cu ta cay bou di e cadena Hudicial.