Manera ta conoci e cantidad di turista bou maneho di Minister actual a aumenta. Den cuadro di diferente plan cu e Minister kier bay ehecuta den futuro cercano na San Nicolas a percura pa oficina di turismo na San Nicolas ta full operacional. Den cuadro di esaki a amplia tambe e servicio cu lo wordo brinda for di oficina di turismo na San Nicolas.
Oficina di turismo San Nicolas
E meta di e maneho di Minister di turismo lo ta pa stimula movecion di turista na San Nicolas y cuminsa un campaña agresivo pa mercadea San Nicolas bou turistanan. Brinda nan informacion di tour y experencianan cu e area bunita di pariba di brug por brindanan. Esaki ta motibo principal dicon traves di A.T.A. a percura pa emplea permanente dos tour guide certifica y experencia na oficina di turismo na San Nicolas.
Proyectonan na San Nicolas
Na augustus Parlamento di Aruba lo trata e ley di TPEF den cual Minister di Turismo a percura pa aloca fondo pa drecha “Rodgers Beach” den su totalidad. Esaki ta encera renoba e piernan por completo, amplia parkeo y e beach. Na mes momento e simannan nos dilanti lo tin “groundbreaking” di e proyecto na “Baby Beach”.
Diaranson venidero San Nicolas Business Association ta organisa un “business summit” caminda a invita investornan pa presenta proyectonan concreto pa San Nicolas. E meta ta pa riba termino cortico por realisa e proyectonan cu ta wordo presenta. P’esey e investornan mester presenta proyectonan realistico cu un plan di ehecucion. Na mes momento tur stakeholders, sector priva y publico, cu lo por percura pa realisa e proyectonan aki tambe ta invita na e “business summit” aki.
Pa conclui
Nos ta optimista y como fraccion di MEP nos ta kere den e proyectonan menciona y e maneho agresivo cu Gabinete Wever-Croes lo bay hiba pa crea desaroyo na San Nicolas. Por ultimo nos kier menciona cu e destaho publico pa e compleho deportivo “Prinses Christina Beach Volleyball Complex” na San Nicolas lo inicia e luna aki.
