Parlamentario Rocco Tjon(MEP): ‘Cambio di ley di “Winstbelasting” y “Freezone” ta pa Aruba cumpli cu normanan internacional’ 

Ta necesario pa Aruba, como pais, cumpli cu normanan internacional manera indica door di por ehempel e Organisacion pa colaboracion y desaroyo economico (OESO). Y un di e metanan di e organisacion aki ta pa mitiga construccionnan fiscal riesgoso.

Na september 2013 un grupo di 20 pais (G20) a firma un plan di accion pa atende cu “belastingontwijking” y na october 2015 a defini 15 punto cu e paisnan mester a tene nan mes na dje. Den cuadro di esaki ta importante pa nota cu na 2018 Aruba a bira miembro y p’esey ta necesario pa e cambionan tuma luga pa asina como pais no actua empugna cu e palabracionnan haci.

Cambio ley di winstbelasting.
Na 2018 Aruba a bira miembro di e “Inclusive Framework” di “Base Erosion and Profit Shifting”. E cambio actual den e ley ta tene cuenta cu e punto di accion 13 cual ta enfoca riba documentacion di “transfer pricing”, “country-by-country report” y standarisacion di documentacion. Na mes momento intercambio di informacion fiscal automatico internacionalmente entre autoridadnan. E ley aki lo regarda primordial multinacionalnan y pa evita mal practicanan fiscal.

Cambio di ley di “freezone”:
E cambio di ley aki tambe ta pa como pais nos cumpli cu normanan internacional di OESO, pa asina e regimen di “freezone” cumpli cu rekisitonan di “Forum on Harmful Tax Practices”. Asina lo mitiga y combati construccionnan fiscal cu ta haci daño y evita cu cierto servicionan por wordo brinda for di den “freezone”. Esaki lo keda posibel pero na un forma limita y lo exclui entre otro: 1) servicionan financiero 2) servicionan notarial, di abogado y servicionan fiscal.

Pa conclui.
E cambionan di ley aki ta un paso necesario pa fortifica nos estado di derecho, den e sentido cu nos ta bira un pais cu no ta promove mal practicanan fiscal. Al contrario nos ta combati esaki door di percura pa nos leynan ta cumpli cu normanan internacional.