Encuanto si gobierno di Aruba mester firma si of no e acuerdo cu Hulanda pa asina nos por tin acceso na ayudo financiero, e posicion di parlamentario Rocco Tjon y tambe di fraccion di MEP ta cu e condicionnan manera Hulanda a ‘impone ta desproporcional.’

Nan ta wardado un feedback ultimo di parti gobierno pa cu e negociacion cu Hulanda pa asina nan por fiha un posicion final. Pero manera con e condicionnan di Hulanda ta ariba mesa aworaki, e no ta conveni pais Aruba, parlamentario Tjon a declara na e matutino aki.

Faltando apenas un par di dia pa diabierna awor lo wordo celebra e reunion di conseho di minister di Reino na Den Haag, e ta mira cu e condicionnan aki tin hopi desbentaha pa pais Aruba ariba tereno huridico, pero tambe riba tereno di maneho. E ta haya cu e hecho aki ta bay mucho mas leu simplemente firma un acuerdo. Y despues pensa si pais Aruba ta bay haya e sosten financiero di Hulanda pa e temporada cu e Covid crisis ta bay dura.

E ta haya cu unabes bo ta duna e entidad OHH/CHE e autoridad cu ta poni den e ley di Reino, e ta bay mucho mas leu cu simplemente supervisa finanzas publico. Pa medio e di entidad aki, Hulanda ta bay tin autoridad tambe riba tereno di cuido, economico, financiero, husticia, laboral, enseñansa, infrastructura, etc… “Pues e ta bay hopi leu,” el a bisa.

Mocion y posicion

El a referi cu fraccion di MEP a fiha su posicion pa medio di un mocion cu a wordo aproba unanimamente den Parlamento. Pero den e mocion tambe nan a pone cu ta duna espacio pa gobierno negocia cu Hulanda.

Nan ta urgi gobierno pa sigui negocia. E ultimo feedback cu Parlamento a haya di gobierno y tambe pa medio di e cumbrenan virtual cu gobierno a duna cu diferente sector, nan por a ripara cu no tin mucho ‘paso den e bon direccion, pasobra Hulanda tabata intransigente’.

Sinembargo despues di e ultimo presentacion cu gobierno a haci den Parlamento, e negociacion cu Hulanda a continua. Parlamentario Tjon a laga sa cu Parlamento ta keda na espera di e ultimo actualisacion of feedback di parti di gobierno pa cu e negociacionnan. “Te ora nos por fiha un posicion, ” el a bisa.

E ta considera cu tin un punto cu hopi hende ta lubida, esta cu si bo ta bay di acuerdo cu e condicionnan di Hulanda, aworaki pais Aruba solamente lo haya sosten di likides di 204 miyon florin cu tabata pa cubri e periodo di juli, augustus y september. Sinembargo gobierno a yega na otro forma financiero pa logra cubri juli y augustus caba.

Parlamentario Tjon ta aclaria cu si e placa ta wordo duna aworaki, e lo cubri juli y augustus cu ya caba practicamente gobierno di Aruba a paga, y ta keda september solamente. “E no ta duna bo niun garantia pa october, november y december. Y e sosten di likides cu bo ta bay tin mester na 2021,” el a bisa.

E parlamentario a indica cu Hulanda a bisa cu e aprobacion pa cu e otro fiansanan cu nos lo bay tin mester, ta depende con gobierno di Aruba ta bay ehecuta tur e condicionnan cu tin ariba mesa aworaki.