Aña 2019 lider di fraccion di MEP, Rocco Tjon ta mir’e uno positivo den varios aspecto. Un di nan tin di haci cu hopi di e puntonan cu gobierno a duna di conoce cu kier logra a wordo concretisa tambe.
Esaki no kiermen cu nan ta un ‘stempel parlement’, sino cu e ta haya cu como Parlamento, pero como fraccion di MEP cu ta sostene gobierno, ‘nos mester percura tambe pa nan logra esaki,’ el a declara na Bon Dia Aruba.
Te ultimo momento nan tabata bezig atendiendo cu leynan, manera esun di Winstbelasting pa cumpli cu normanan internacional. Mescos ta conta pa e ley di Freezone, pa evita cu Aruba wordo poni riba lista preto.
Den su re capitulacion di 2019, el a subraya e situacion financiero di Pais Aruba a destaca. Pa dos aña consecutivo, Pais Aruba a conoce dos presupuesto complementario neutral. Kiermen cu no mester di fondo adicional pa cumpli cu ehecucion di presupuesto, normanan financiero y tambe norma di personal.
A pesar di pronostico negativo di parti di oposicion, Tjon ta haya cu esaki tabata e motibo cu Hulanda no por a interveni y bin cu un KB contra Pais Aruba. E maneho financiero estricto ta un hecho cu e ta considera relevante pa 2019. “Aunke e no ta un hecho popular, pero e ta algo responsabel y necesario pa Pais Aruba sali for di e situacion cu ta aden,” el a declara.
A pesar cu e ta haya cu nan recurso financiero ta limita, pero debi na un maneho responsabel poniendo ser humano central, por a logra otro cos tambe. Entre nan -y como otro hecho positivo- el a menciona e rebaho riba tarifa di coriente. Tambe esun cu salario minimo a subi, locual el a cualifica como un logro ‘historico,’ ya cu pa prome biaha ta wordo kibra e plafond di 1800 florin y tambe pensioen di behes a subi. Nan ta incentivonan cu e ta considera necesario pa stimula nos economia tambe y poder di compra.
