Minister di turismo Dangui Oduber a anuncia cu e proceso di destaho publico pa e proyecto Port City Aruba ta den etapa final. Nos ta sostene e vision di minister pa Port City Aruba bira un realidad, pasobra pa hopi aña e tereno aki no ta genera entrada, pero solamente gasto pa pais Aruba.
Manera nos tin entendi lo desaroya y construi mas o menos 8000 meter cuadra pa aña. E impacto cu e desaroyo aki lo tin riba e sector di construccion anualmente ta hopi positivo. Hunto cu e desaroyo aki pais Aruba lo conoce mas cupo di trabou y obviamente mas entrada tambe.
E impacto economico durante y despues di e fase di construccion ta mustra di ta sumamente positivo. Esaki ta loke a conclui di e investigacion pa loke ta e proyeccionnan haci. E impacto riba turismo, segun e modelo di ‘high value low impact’ lo ta significante, pero tambe e lo tin un impacto significante pa loke ta aspectonan laboral y comercio en general.
Nos ta kere den e vision di minister di turismo pa transforma un area morto cu ta costa pais Aruba placa den uno cu ta bay genera entrada pa pais Aruba, cupo di trabou pa nos comunidad y un area recreacional caminda pueblo por acudi pa entretene nan mes y relaha.
Preguntanan por escrito a wordo haci na minister Dangui Oduber, pa e por indica na ki momento lo inicia e proyecto aki.
