Unabes cu a wordo conoci e carta cu Gobernador di Aruba a manda pa Presidente di Staten, Juan Thijsen, Bon Dia Aruba a tuma contacto cu lider di fraccion di MEP, Rocco Tjon, kende a presenta e mocion di desconfiansa contra minister Marisol Lopez-Tromp, durante e reunion publico relacion cu spearfishing siman pasa.
Den su carta Gobernador a notifica cu a ricibi un concepto di un decreto nacional pa aprobacion di Minister Presidente, Evelyn Wever-Croes, pa trata e retiro di Minister Lopez-Tromp. Pero a su bes Gobernador ta pidi un huicio politico di Parlamento tocante e intencion pa retira e minister.
Mirando cu parlamentario Tjon a presenta e mocion di desconfiansa contra e mandatario, Bon Dia Aruba a puntr’e su opinion riba solicitud di Gobernador. E parlamentario tabata masha breve den su contesta, ya cu ayera tardi nan a keda di trata den seno di su fraccion e asunto aki pa trece nan punto di bista.
Sinembargo el a bisa textualmente: “Ora cu Gobernador retira un Minister e mester consulta Staten riba e landsbesluit. Esey ta hancra den constitucion. Den e carta cu nos a ricibi ta skirbi cu e tin e intencion pa retira Sra. Lopez-Tromp y p’esey ta pidi opinion di Parlamento.” Asina el a laga sa.
