Parlamentario di MEP Rocco Tjon a haci bishita na Brandweer Aruba. Segun e mandatario esaki ta di 4 biaha cu su persona ta reuni cu Brandweer y su sindicato . E organisacion di Brandweer a keda laga atras pa hopi tempo y nan tin nan preocupacionnan cu sigur ta alcaso.
Material na brandweer ta algo necesario y cu fraccion di MEP ta considera necesidadnan basico pa asina nan por haci nan trabao na un manera save pa nan mes. Sinembargo den e reunionnan anterior a duna brandweer e palabracion cu na momento cu presupuesto yega parlamento lo sinta un biaha mas hunto cu nan pa asina mira con lo por duna prioridad na materialnan cu nan tin mester.
Sinembargo un di e preocupacion di mas grandi cu nan tin ta e uniform esencial cu ta esun cu mester bisti na momento cu ta sali pa un candela. Ta trata di e pak completo contra di candela, helm, boets y handschoen special. Pa parlamentario Tjon esaki ta un preocupacion legitimo debi cu ta trata di e materialnan basico pa nan por eherce nan trabao na un manera save.
Banda di loke ta material cu nan tin mester tambe tin hopi preocupacion di e investigacion interno cu ta andando den cuerpo di bombero. Tur e trahadonan a vocifera cu nan kier un claridad mas lihe cu ta posibel riba e punto aki. Parlamentario Tjon ta kere cu esaki tambe ta un punto valido no solamente pa e cuerpo y of sindicato, pero tambe pa esunnan cu ta involucra den e investigacion cu ta tumando luga. Pesey mes segun parlamentario Tjon ta hopi importante cu mas pronto cu ta posibel tin claridad riba e parti aki.
Si den e investigacion sali cu nada no a sosode esey tambe mester sali na cla y si tin algo a bay robes e pasonan mester keda tuma pa percura pa tin un leiding fiho pa por hiba e organisacion padilanti. E investigacion mester cana su caminda sin cu e ta keda stroba.
Sinembargo loke cu parlamentario Tjon ta kere cu ta ful na su luga cu no ta conta solamente pa cuerpo di bombero so, pero e ta conta pa cualkier organisacion cu mester percura cu e procesonan aki por ta mas eficiente y por keda agelisa tambe na e momento cu esey ta necesario. Segun parlamentario Tjon no ta solamente un organisacion ta keda perhudica pero na mes momento y mas importante ainda pa esunnan involucra den investigacion. E claridad den e investigacion ta importante pa funcionamento y ambiente di trabao na brandweer, pero tambe pa e persona sa unda e ta para cu henter e situacion.
No ta na su luga cu ta manda un bombero pa combati un candela grandi sin cu e tin e uniform adecua pa su siguridad. Tambe a elabora riba e plannan pa futuro y un di nan ta pa busca un manera con e auto principal di brandweer por keda drecha . Sindicato a keda di acumula tur e informacion necesario pa asina parlamento ricibi esakinan. Fraccion di MEP sigur ta admira con sindicato SINBA di un manera hopi responsabel ta atende cu e retonan pa asina conhuntamente yega na solucionnan fructifero pa e organisacion di Brandweer Aruba.
