Parlamentario Robert Candelaria a declara recientemente durante un entrevista e preocupacion continuo riba e tema di criminalidad riba nos Isla. Trabou di parlamentario den oposicion sigur di importancia pa trece contribucion positivo constructivo pero tambe critico riba Gobierno di pais Aruba
Cifranan ta alarmante mas aun si mira y compara esunnan di atraco cu ta tumando luga.
Minister di Husticia actual den su añanan di oposicion tabata pidi constantemente reunion publico, mocionnan di desconfiansa, apelando pa e minister e tempo ey bay su cas pasobra e no ta sinti cu e por a eherce e encargo. Cu cada atraco e tabata Highlight y mustra dicon e no tabata apto. Ta algo cu pueblo den su totalidad ta corda fresco den mente.
For di campaña te cu awe den parlamento, e tema di atraco tabata su punch bag. Sinembargo e realidad ta cu un atraco no ta dependiente ken ta den gobierno ni ken ta minister. Un atracado no ta bay cuestiona si ta Andin Bikker of no ta den e cargo of si ta pensa dos biaha pa evita un atraco paso nan por keda gara. Absolutamente no ta alcaso, no ta import’e y lo continua cu su plan di atraco cueste loke cueste.
Ironia si di parti Minister Andin Bikker ta cu e la proclama di tin un plan concreto y pragmatico den man. Tabata locual e la vocifera pa ocho aña sinta den stoel como parlamentario, durante campaña y hopi mas prome den su partido anterior. Den su boca semper “Dowers no ta sirbi, e si ta bin fix tur cos”.
Atraco ta keda alarmante!
For di 2019 por a tuma nota cu cifra riba atraco ta aumentando. Di experiencia por apunta cua ta e High season di atraco, cu ta fin di aña y temporada di carnaval.
Algun momento si nota cu cifra ta cay un rato, por tabata tin hopi factor, naturalmente esey ta bon pa Aruba, tur hende kier mira cifra baha pa tin menos atraco. Pero logicamente tin cu tene cuenta cu algun figura cu tabata deteni pa algun tempo cu lo bay sali liber y cu chens di ripiti nan delitonan acostumbra, cu lo bay ta halto. P’esey ta cuestiona e ora, unda e plannan cu e minister aki a propaganda asina tanto a keda? A tene cuenta cu tur factor of e plannan aki nunca a existi, cual ta bisto.
High impact crimes
Deseo ta un cos y realidad ta otro. Locual cu realmente e ta haciendo, ta nada! Y obviamente e pueblo cu hopi pregunta riba plan y promesanan di Minister Bikker. Maneho di Husticia ta algo compleho y bo no por sinta y spera cu e ta cay na e manera cu bo a soña of desea. Na Hulandes nan ta bisa “nattevingerwerk”. Den otro palabra slordig, con cu ta , sin cu a prepara adelanta pa e cargo aki. E no ta bay asina. Tin cu traha cu cifra, realidad y experiencia. Atraco ta algo cu a tuma luga semper. Atraco no ta algo cu bo por bay stop total nunca. Locual cu si Robert Candelaria ta kere cu manera su colega Dowers a bisa cu Minister Bikker tin cu scucha su mes un conseho como parlamentario Bikker y atende cu su plan of saca su conclusion y baha pa caba. Esey tabata su propio midi, uza contra su contrincante Dowers durante su periodo den gobierno.
Ekipo sin Polis pa maneha
A mira brommer, auto y helicopter y asina algun ekipo extra, algun cu tabata den planificacion di e maneho anterior cu sigur ta positivo pa mira. Pero ekipo nobo sin extra polis pa haci uso di e tools aki ni tampoco suficiente polis pa core patrouille no tin ningun sentido. Realmente kier purba combati high impact crimes mientras e maneho en realidad ta contradeci esaki. Atraco no ta baha ora Minister Bikker ta “hope for the best”. Si bo maneho no cambia, pero bo ta solamente dune un nomber nobo, e resultado lo ta mes cos. Manera Einstein a bisa cu e definicion di locura ta “doing the same thing over and over again and expecting a different result”.
No tin klas nobo pa Polis
Nos ta bibando den periodo cu apenas tin klasnan di polis ta bay cuminsa, siendo cu Minister Bikker a primiti 200 polis nobo na inicio. Esaki ta algo cu Parlamentario Robert Candelaria a cuestiona na mas di un ocacion. Con por ta posibel cu tin un klas nobo pa cuminsa cu apenas 14 aspirante? Na momento cu a cuestiona esaki a habri luga pa dos polis mas. Logica ta indica cu e cantidad di polis nobo mester ta mas grandi cu e cantidad saliente pa bo Cuerpo crece. Awor nos por mira e contrario tumando luga teniendo cuenta cu e realidad awor ta cu e cantidad di polis cu ta bay baha cu pension y esnan cu ta kita pa motibonan personal, ta mas grandi cu e cantidad cu ta bay drenta. Ta Minister Bikker su lema, cu ta bay mira mas blauw riba caya. Su lema y su maneho lamentablemente no ta mes cos, pasobra su prioridadnan ta mustra di ta robes, mirando cu e realidad ta tristo y contrario.
Atraco cometi pa Venezolano
Den un conferencia recien por a scucha e mandatario menciona cifra caminda e ta insisti cu ta Venezolanonan ta cometiendo mayoria atraco riba nos Isla. Cifra cu Cuerpo policial a saca ta contradeci esunnan di su persona. Ami lo kere esunnan di polis prome. Ta comosifuera e mandatario no ta den coordinacion cu su departamentonan ni cu su propio maneho. Hopi palabra, tiki hecho!
