Despues cu Prome Minister Evelyn Wever Croes a regresa for di Hulanda, el a haci varios declaracion pa splica resultado di su reunion na Den Haag y durante e rueda di prensa, entre otro el a bisa cu su gobierno no a entrega e presupuesto di 2020 ainda, pasobra cu a scucha pueblo y pueblo no kier mas medida.
Parlamentario Robert Candelaria di fraccion di AVP ta mustra cu Premier Wever Croes e ora a declara cu su gobierno a bay busca alternativanan pa haya placa sin cu nan tin cu bolbe castiga pueblo cu mas medida.
“Sinembargo e alternativanan cu Prome Minister a papia di nan, no ta mucho cla ainda y no ta splica con esaki lo evita cu pueblo lo haya mas medida.
Na prome luga gobierno kier kita miyones di florin di ATA su presupuesto pa cera buraconan cu nan mes ta creando y manera CAft a indica , gastonan di gobierno a aumenta cu mas cu 100 miyon florin y esaki ta debi na gobierno su maneho actual y no pa baha debe nacional.
Ora cu ranca placa di ATA, ta rancando placa di e unico pilar economico cu Aruba tin actualmente y ora e efectonan di e rancamento di placa aki bira visibel, lo bo mira cu e lo afecta nos turismo indudablemente.
Ya nos ta ricibiendo cifranan cu ta indica cu por spera un caida di turismo otro aña pa Aruba di 1.4% y net di e presupuesto aki, gobierno ta dicidi pa kita placa? Esaki no ta medida?
Berdad, no ta bay kita esaki den mas BBO awor, pero ora empresanan cu ta labora directamente of indirectamente den turismo cuminsa kita hende, no ta pueblo ta pagando pa e maneho robes aki? Pues ta kita e placa awe di ATA pa bisa Hulanda cu tin un bon maneho financiero, esaki no ta structural. Of ta pensa pa ripiti esaki na 2021?
Y ora e mal maneho aki cuminsa afecta nos turismo mas y cu nos entradanan baha, di unda lo ranca e placa e ora?
Tambe gobierno ta pensa pa bay kita placa di empresanan di utilidad. Si bo ta ranca dividendo di e empresanan aki y ta cobra nan cantidad di placa dor di laga nan cumpra tereno cu ya nan tin den erfpacht, ta di unda e empresanan aki mester saca placa pa paga esaki?
No ta pueblo mes mester bay paga mas na awa y coriente pa asina WEB y Elmar por paga nan debe nobo y debe innecesario?
Ora WEB y Elmar bay fia placa cu nan no mester, pa duna gobierno, no ta pueblo mester bay paga esaki toch? No ta mescos cu medida esakinan ta? Djis awor ta paga esaki na awa y coriente, na luga di den supermercado. Pueblo, bo ta sigui paga e medida mescos, djis pueblo ta paga na un otro caha pero realmente e situacion mes, nada a cambia.
Por ultimo nos ta tende cu gobierno kier bin cu permiso pa un empresa cultiva marihuana na Aruba pa exporta. Esaki ta e alternativa cu pueblo ta pidi? Sin medida, pero bende Aruba pa marihuana? Esakinan no ta alternativa pa yuda Aruba, pero pa sink Aruba.
Si gobierno realmente kier yuda Aruba, mester baha nan gastonan extra cu nan a bin cune y no bende Aruba pa gana un poco placa, pero na prijs cu despues bo no por ni kier paga.
Legalisa produccion di marihuana ta bay costa nos pueblo hopi mas caro cu nos ta kere y e daño ey no ta facilmente reparabel,” Parlamentario Robert Candelaria a declara.
