No ta desconoci cu Aruba ta pasando den temponan financiero hopi dificil, caminda unda cu bo bira, bo ta scucha hende cu ta keha cu costo di bida ta demasiado halto. No por paga cierto cosnan mas y awor cu fin di aña ta den porta, tin hopi famia confrontando retonan grandi pa por purba di celebra dianan di fiesta toch un poco cu famia y sernan keri.

Miembro di fraccion di AVP, Robert Candelaria a mustra cu pueblo su forsa di compra ta cayendo, pa motibo di inflacion cu ta subiendo rapidamente un biaha mas, cu ta consecuencia di un maneho financiero devastador di gobierno. Awor si tur hende di berdad ta sinti e cambio.

“Dia 18 di november ultimo tabatin un ‘openbare bijeenkomst’ den Parlamento cu minister di Finazas, Economia y Cultura, señora Xiomara Ruiz-Maduro. Den e encuentro aki minister a bin papia riba e ‘Najaarsnota’ di 2019. Den esaki e minister a menciona diferente cos cu mester para keto na nan. El a bisa cu gobierno ta traha pa mehora e forsa di compra dor di:

  1. Amplia canasta basico di 11 pa 22 producto;
  2. Control di supermercado tur dia cu team multidisciplinario cu e.o. polis y departamento di salubridad;
  3. Gobierno y RDA a absorbe Afl 0,37 di prijs di gasolin (mei-juli);
  4. Inkomstenbelasting & Loonbelasting a wordo elimina pa 25 mil persona;
  5. 12 mil persona no ta paga grondbelasting mas.

Lo ta bon pa analisa e puntonan aki cu supuestamente mester mehora pueblo su forsa di compra segun e minister.

  1. E canasta basico a wordo amplia cu productonan cu gran mayoria di consumido no ta cumpra toch y no ta uza como producto basico. Ora ta papia di canasta basico, riba su mes e ta algo bon, pero e no ta nada mas c’un prijs fiho y maximo pa cierto producto. Con esaki ta yuda bo forsa di compra ora ta trata di producto cu hopi hende no ta uza y ta solamente prijs maximo? E no ta yuda cu bo tin mas placa pa gasta ni bo gastonan no a baha.
  2. Pueblo no ta scuchando di a accionnan aki. Si ta berdad cu nan ta tuma luga, ta algo di aplaudi pero con esaki ta yuda bo forsa di compra? E ta nifica cu si un negoshi no ta cumpli cu cierto prijs maximo of ta kibra otro regla stipula pa gobierno, e negoshi specifico aki lo haya e consecuencia di multa of algo similar. Con esaki ta yuda forsa di compra di pueblo poniendo mas placa den bo cartera of reduciendo bo gastonan?

3 RDA a absorba e parti aki, cu berdad si ta bon pa bo forsa di compra, pasobra e lo baha un gasto di bo pero e mesun RDA aki ta haya awor menos entrada y mester paga mas na dividendo na gobierno cu ta debilita e empresa estatal aki. Esaki a largo plaso, no ta yuda pueblo su forsa di compra, si mester reverti e decision aki.

4 E reduccion di Inkomstenbelasting y Loonbelasting di 25 mil hende no ta berdad. Si ya caba tabatin un cantidad di alrededor di 20 mil hende cu ta cay bou di e belastingvrije voet, di con ta tira santo den wowo di hende y bisa cu a bin 25 mil hende extra cu no ta paga awor. Tambe e medida aki a pone cu hende cu sueldo mas halto, mester a bay paga mas, cu ta negativo pa nan forsa di compra.

  1. Mescos ta conta pa grondbelasting. Hendenan cu tin casnan bou di un cierto balor ya no tabata paga grondbelasting. Atrobe ta trata di miles di cas. E cantidad no ta berdad pero hendenan cu casnan riba un cierto balor a cuminsa paga hopi mas tanto na grondbelasting, cu atrobe ta malo pa forsa di compra di e grupo grandi aki.

Tur esakinan ta ehempel di con a bende pueblo un 6 pa un 9 ora ta bisa cu ta mehora pueblo su forsa di compra pero nan no ta reduccion di gasto pa pueblo of aumento di placa den cartera di pueblo.

En realidad e unico berdad di e plan di Minister di Finasa Xiomara Ruiz-Maduro ta cu despues di a ranca miyones for di pueblo, gabinete Wever Croes no kier duna pueblo ni un cen preto bek pa alivia su situacion financiero y ta crea cosnan cu pueblo lo no tin beneficio di nan directamente,” Candelaria a declara.