Parlamentario Robert Candelaria (AVP): Gobierno di MEP atrobe ta confirma cu campaña ta un cos y gobernacion otro cos; Asunto di permiso a sorprende hopi hende  

Covid a bolbe enfatisa cu  gobierno actual, realmente ta mira un diferencia den campaña electoral  y gobernacion caminda ta priminti shelo y tera den campaña y ora tin cu goberna ta saca huña y mustra kico nan intencion realmente ta. 

Parlamentario pa fraccion di AVP, Sr. Robert Candelaria ta mustra cu no ta prome biaha cu e cos aki ta sosode y ta net ex lider di MEP Nelson Oduber, a yega di bisa pueblo cu campaña ta totalmente diferente na gobernacion di e pais.

“Gobierno ta priminti te hasta amnistia y asilo den campaña di ciudadanonan di otro pais pero ora goberna ta keda sin prolonga permiso di hendenan cu ta biba y traha legalmente na Aruba pa añanan caba.

Ta imperativo pa nos cuida nos frontera, nos mercado laboral y reglamenta ken ta drenta ya cu un ‘free for all’  no ta aceptabel pero e otro extremo tampoco por ta aceptabel, caminda ta uza hende y despues core cu nan y no kier tende di nan, locual simplemente no por.

Mi por a tuma nota cu e empleado, como relacionista publico Dimas,  ta splica Minister su maneho pa cu permiso pa stranhero, un maneho den cual mayoria di hendenan cu a bin yuda pone nos economia y carga nos turismo hunto cu nos, awor ta ser trata di e forma aki.

Un di e puntonan cu a wordo presenta ta cu ’Personanan cu tin menos di 5 permiso lo por haña un renobacion di nan permiso di trabou den caso cu e mercado laboral ta permiti y nan tin den poder di un documento positivo di DPL’.

Loke por interpreta di e maneho di e Minister encarga cu esaki, ta mustra cu tin un bon chens cu lo no prolonga permiso di trabou di e hendenan aki si nan tin 5 permiso of menos.

Aki atrobe nos ta mira cu Minister ta prefera pa tira su trahadonan bou bus ora mester duna un mensahe cu tal bes ta menos popular den su bista.

Aki Minister mester a duna cara y anuncia su maneho y no laga e ciudadanonan aki den un incertidumbre.

Nos ta lamenta cu minister Andin Bikker di Dimas y minister Glenbert Croes di DPL mes no a bin splica e cantidad grandi di hende bibando y trahando legalmente na Aruba cu e maneho ta bay cambia y tal bes nan lo mester bay nan pais bek.

Bay back despues di a inverti den Aruba y cuminsa un bida aki pa nan mes y nan famia. No mester trata hende asina.