ORANJESTAD – Na luna di december a tuma luga e actividad di algun dia “Mi wiel tambe ta conta”. Meta di e actividad tabata pa topa cu esunnan cu limitacion fisico den comunidad, pero tambe cu clientenan di Maristella y Funari. Fraccion di AVP a entrega un peticion na minister di Husticia via di su consehero Milko Baiz. “A dedica e proyecto na Jose Solagnier den felis memoria cu a pidi mi esaki pa su yiu”, asina parlamentario Robert Candelaria a duna di conoce.
Den e peticion tabata inclui un carta cu a base di ley di trafico existente ta pidiendo pa bin cu parkeerkaart pa automobilistanan cu tin limitacion fisico. Parlamentario Robert Candelaria a expresa cu esaki ta nifica cu nan tin un carchi otorga dor di Cuerpo Policial cu nan por colga na un luga visualmente den auto. E carchi aki ta duna persona cu limitacion fisico e derecho pa staciona den e parkeervak cu tin e borchi di rolstoel.
A haci entrega di e peticion aki hunto cu concepto di “aanvraag formulier” cu ley ta stipula hunto cu e concepto di un sticker mes y un concepto di Ministriële Beschikking cu cada borchi mester tin. “Mi a pidi cooperacion di Minister y di Korpschef,” e parlamentario a expresa. A tuma e momento pa sinta cu e Chief of Staff di Alto Comisario di Polis, esta Silvio de Mey. Resultado di e reunion aki tabata hopi bon y a delibera riba kico mester tuma luga pa por implementa e cambionan den ley y den maneho.
A palabra cu aki 2 siman lo topa atrobe pa mira si tin cosnan ainda pa clarifica of papia cu otro y despues lo bay over na e parti di implementacion. Esaki ta nifica cu ta spera a corto plaso di por tin e procedura y asina chauffeurnan por yega Cuerpo Policial pa haci nan aplicacion hunto cu un carta di dokter, pasfoto, etc. pa bin na remarca pa nan parkeerkaart.
Ley ta yama esaki gehandicapten parkeerkaart y ta duna autoridad na polis pa duna multa na esun cu no tin e carchi, pero cu toch ta para den e parkeervak. Parlamentario Candelaria ta contento cu e pasonan tuma y ta premira di keda cla cu ne pa Cuerpo Policial introduci esaki oficialmente den e prome kwartaal di e aña aki ainda.
E peticion aki a cana lihe y p’esey parlamentario Robert Candelaria ta contento. Durante e evento a haya un miho idea di cuanto hende den comunidad tin mester di esaki. Cuerpo Policial mes a accentua e reto di parkeermento di auto dor di e ancianonan, hendenan grandi, door di nan edad no por move mesun bon mas. Esaki ta algo cu mester bay mira den e cuadro legal si nan tambe por aplica y bou cua condicionnan.
“Si tur hende pensa hunto y busca con pa traha hunto, nos ta zorg pe grupo di hende nan aki por conta cu mas y miho mobilidad den comunidad”, e parlamentario a expresa. Nan tambe lo por gosa di bida na un manera mas facil y ta contento di por a forma parti di esaki.
