Parlamentario Robert Candelaria (AVP): ‘Aumento di costo di bida ta trece aumento den problemanan social’

Diahuebs durante e conferencia di prensa di AVP a hiba palabra Parlamentario Robert Candelaria kende a elabora riba diferente tema. “Nos ta bibando den temponan dificil pa nos pueblo. Pueblo kier mira solucion pa su dolornan, y esaki ta e caso den hopi area di e bida diario. Trabou di e politico ta pa señala cosnan cu no ta bay bon y trece esaki na conocemento di pueblo y di gobierno pero tambe pa yuda busca mehoracion.

Nos tin un gobierno cu no ta gusta scucha, ni di su mes hendenan, cu no por simpatisa cu dolor di pueblo, y esey tin nos caminda nos ta awor.”

Candelaria a señala cu comunidad ta wordo confronta cu hopi dolor y un ehempel ta e forsa di compra ta bayendo atras rapidamente. Cifranan di CBS ta mustra cu entre december 2017 y augustus 2019 e forsa di compra di pueblo a cay drasticamente. E presupuesto cu 2 aña pasa tabata suficiente pa un cas cu 1 persona so of e presupuesto pa un cas di un famia di 4 persona a crece barbaramente. Pa e cas di 1 persona so, su presupuesto pa por sobrevivi, a aumenta di december 2017 pa augustus di e aña aki cu Afl 300. Pa e famia di 4, e presupuesto aki a conoce un aumento ainda mas grandi di Afl 600 pa luna. Tur esaki a tuma luga den un tempo na unda no tabatin aumento di entrada. Ya hopi hende no por carga e aumentonan aki y ‘nos a nota cu dialuna ultimo e pueblo di San Nicolas a cuminsa bati alarma cu nan no por sigui asina. No ta San Nicolas so, pero tur bario ta bisando nos e mesun cos’.

E perdida di e forsa di compra no ta bin sin mas, segun e Parlamentario. Y e ta bay combina cu otro retonan cu e pueblo ta pasando aden. “Hopi biaha e aumento di costo di bida, ta trece cune un aumento den problemanan social. Si un famia ta gana suficiente placa pa biba, e risico pa miembronan di e famia bay den mal caminda ta mas chikito. Ora cu bo no ta logra haya suficiente entrada, e scenario ta cambia y por tin como consecuencia un inclinacion pa criminalidad, negligencia di nos hobennan y otro problemanan social cu tambe ta aumenta.”

Perdida di poder di compra tin consecuencia negativo pa sociedad. Y ehempelnan di esaki por mira den enseñansa y tambe den husticia. “Tur ora cu mi papia cu hendenan den ramo di husticia y den enseñansa mi ta tende ehempelnan con nos profesionalnan ta wordo confronta cu casonan hopi dificil pa deal cune. E relacion entre problemanan social, familiar, financiero y hudicial ta bira cada dia mas bisto.”

E ta un tema cu Candelaria ta bisa di a studia hopi durante campaña, a traha riba plan di prevencion di criminalidad. Su pensamento ta cu combati criminalidad so, sin trece cambionan pa mehoracion door di inverti den prevencion, ta mescos cu carga awa hiba lama. Mescos cu den e area di husticia, e mesun principio di prevencion aki ta aplicabel den area social tambe. Mester traha dilanti di e problema pa evita cu e problema ta bira un realidad.

E ta haya cu criminalidad ta bay man den man cu prevencion di problema den e area social. Gobierno mester busca forma pa fortalece e forsa di compra di esunnan cu ta wordo afecta mas tanto den comunidad. Esey ta un di e miho formanan di prevencion pa comunidad actualmente. Na mes momento mester traha riba Prevencion di problema social riba mas frente pareu. Casi semper por nota cu ora neglisha e situacion den e area di forsa di compra y den e area social, e ta bira un problema pa husticia. Esey semper ta unda e problemanan ta culmina. Husticia mester deal cu e consecuencianan di e otro areanan cu no a funciona manera debe ser. E miho prevencion cu ta existi den e area social ta famianan stabiel y un bon control social. Control social ta ora cada ciudadano tin bista riba esunnan rond di dje y ta yuda cuida otro. Ora un hende nota cu algo ta fuera di normal cerca esunnan rond di dje e ta haci algo pa yuda catch, cuida of guia esun cu e ta mira na peliger. Aki gobierno por hunga un rol importante pa informa y educa pueblo con pa realisa esaki.