Parlamentario Richard Arends(AVP): ‘Un berguensa pa mira un prome minister di nos pais yega na calumnia di e nivel aki’

“E informacion cu Prome Minister Evelyn Wever a pone den un post riba Facebook ta incorecto y tambe ta incompleto,” Parlamentario Richard Arends a reacciona den un conferencia di prensa di fraccion di AVP e siman aki.

El a splica cu loke e Prome Minister a referi na dje ta un hecho cu ta data di 2016 ora cu e no tabata ocupa ningun funcion publico y tampoco tabata tin ambicion politico. Manera tur hende por corda, na aña 2015, el a splica, durante casi un aña largo el a lidera e team di negociacion di Refineria di Aruba cu Citgo. Na october di 2016 empresa estatal Refineria di Aruba NV a keda estableci. Alvin Koolman e tempo ey tabatin mester di un persona cu conocemento financiero, pero cu tambe tin conocemento di e contracto cu Citgo. “Mi a wordo acerca pa asumi e funcion aki y mi a acepta. Pero prome cu mi por a asumi e puesto, mi a wordo acerca pa bira minister di Asuntonan Economico. Na e momento ey mi a notifica e accionista, Minister de Meza cu mi no por tuma e posicion mas. No tin nada cu a wordo gefix, pasobra mi a drenta arena politico despues cu Otmar Oduber a tuma su retiro.”

El a enfatisa cu e no por “claim” un derecho di un funcion cu nunca el a eherce. Si e tabata kier a asumi e funcion ey mes, e por a bay sinta aya despues di eleccion pero no a haci esey. E Parlamentario a bisa di no ta compronde tampoco e ponencia cu un contracto di tres aña pasa cu nunca a wordo ehecuta, ni cu a page, por tin influencia riba e situacion financiero di RDA awe. Loke cu tin influencia riba e situacion di RdA awe ta pagonan na e bufete di abogado yega na e mandatario, pago na su familiarnan, ademas cu no ta ricibi entradanan di Citgo regularmente. “No tin un “afkoopregeling”, ni tampoco pensioen cu ta wordo paga door di RdA na mi persona. Ademas e funcion, nunca a wordo inscribi na Camara di Comercio. RdA a wordo funda na notario y por tin tres director manera tur otro compania estatal. Sra. Prome Minister por dal bay y sigui yena e otro dos funcionnan.”

El a lamenta si e politica barata cu ta wordo hunga, creando un impresion eroneo, purbando di atacha su nomber y integridad. “Semper cu mi a traha pa Gobierno of sector priva, mi a traha di un forma profesional y corecto, uzando mi conocemento y cu respet pa mi profesion.” E decepcion di mas grandi cu e tin den henter e asunto aki ta cu e Prome Minister tambe a cay den e wega siendo cu e sa cu e contracto ey nunca a wordo ehecuta. “Mi no ta cuestiona capacidad di ningun hende y tur hende conoce mi pa awo. Mi no ta hiba un politica a base atake personal sino mi lo a sinta awe mainta y mustra henter e lista di huur y di consehonan experto paga. Pero mi no ta haci esey. Aruba no ta wordo beneficia cu esaki. Mi politica ta basa riba contenido, mi ta haci uzo di mi derecho di expresa mi mes y di haci pregunta cu nunca por wordo contesta.”

Ironico den henter e situacion aki ta cu durante e ultimo dos añanan miembronan di diferente hunta nan di comisario di empresanan estatal, apunta pa e Gobierno actual, ta tuma contacto cune cu pregunta riba e refineria, pa puntra su opinion riba cierto aspectonan huridico. Na interes di Aruba, “nunca mi a keda sin coopera, of a keda sin duna informacion.”

Pa loke ta e tema di integridad, e Parlamentario a bisa cu e ta apoya Prome Minister totalmente. “Pero e no mester ta un smoke screen. Integridad mester conta tur caminda. Familiarnan directo cu ta depende y cu ta defende interesnan di empresanan cual abo como Prome Minister ta responsabel pe, no ta pas den e linea di Integridad. Yenando aparato Gubernamental y empresanan estatal cu famia, no ta pas den e linea di Integridad.”