Den su afan pa bin cu medida pa evita un KB, AMvRb y Rijkswet cueste lo que cueste, Gobierno ta presenta plannan y premesanan realistico for di dia cu nan a asumi responsabilidad. Den e procotol firma cu Hulanda na november 2018 a presenta un Memoradum Financiero-Economico (FEM), como tambe un maneho pa reduci gastonan di personal (BVP) y pa reduci gastonan di cuido medico. “E estudionan aki a wordo hasi den pura, sin analisis debido y sin ningun tipo di dialogo of consulta cu stakeholders. Awe Hulanda ta wanta Gobierno di Aruba na e resultadonan di e estudionan aki y ta wordo usa contra pueblo memei di e crisis cu nos a conoce,” segun Parlamentario Richard Arends (AVP).

Den su informe di e di tres cuartal di 2020 riba ehecucion di presupuesto, CAFT ta indica cu e solidaridad di e empleado publico cu a entrega 12.5% di su salario, ta e unico cos cu a percura pa reduccion di gastonan di personal. E cantidad di personal a keda mesun cos, pero na mes momento gobierno no a sa di cumpli cu loke nan a anuncia den e maneho pa reduci gastonan di personal (BVP). “Esaki ta nifica cu ademas di reduccion di salario di empleadonan publico, Gobierno tin di bay cumpli cu loke nan mes a promete Hulanda anteriormente,” Parlamentario Arends ta conclui. “No solamente ta exigi pa empleadonan publico tin solidaridad, pero riba dje ta exigi pa nan cumpli cu mesun plan di reduccion di gasto di personal cu Gobierno mes a inventa.”

Tur hende por corda tambe e Memoradum Financiero-Economico (FEM)di algun aña atras, unda cu a promete recortenan, aumento di impuesto y solucion pa ‘tur reto financiero’, segun Gobierno. Mescos ta conta awe cu e estudio di PWC cu Gobierno di Aruba a pone AZV hasi unda cu a presenta un solucion bunita sin dialogo, sin fundamento, sin consistencia, sin cu e ta forma parti di un maneho integral. “Awe tur e promesanan y estudionan aki ta wordo usa contra Gobierno y pueblo tin cu paga pa e falta di consideracion aki,” segun Parlamentario Arends.

Gobierno a laga traha un pa reduci gastonandi cuido medico, mirando cu esakinan ta subi automaticamente tur parti di mundo. “E consehonan duna a wordo cuantifica na un reduccion di 5 miyon florin pa luna. Ta di lamenta cu no tabata tin ni consulta ni dialogo cu e mundo medico, siendo cu nan a indica otro formanan di yega na mesun resultado di manera structural sin cu e lo a afecta cuido medico, e pashent y nos poblacion.”

“Aruba lo conoce un acumulacion di medida. Gobierno ta sinta lomba contra muraya cu un exigencia di reduccion di gasto di cuido medico di 5 miyon florin pa luna, hunto cu exigencia di reduccion di salario di e empleado publico, pero tambe reduccion di cantidad di personal sin cu nan por sali afor di un condicion cu Gobierno mes a presenta prome cu COVID-19,” Parlamentario Arends a finalisa bisando.