E ‘reapertura di nos fronteranan’ ta wordo asocia hopi lihe na e retorno di nos actividadnan economico manera cu nos a laga nan atras na inicio di maart 2020 prome cu e medidanan a wordo implementa pa evita plamamento y contagio di e virus riba nos isla.
Parlamentario Arends ta mustra cu oposicion mester wordo hiba di un manera responsable y realista. Na vispera di reapertura di frontera den luna di juli, miembro di fraccion di AVP, Sr. Richard Arends a para keto un rato riba e actividadnan economico ora cu fronteranan habri y e rol cu Gobierno mester tuma. “Banda di e aspecto di salubridad publico, mester tin un plan di sosten pa nos economia, comercio y mercado laboral riba termino hopi cortico,” e la declara.
Parlamentario Richard Arends a mustra cu segun pronosticonan di Aruba Tourism Authority (ATA), Aruba lo bay bek na cifranan di turismo cu nos a conoce na aña 1992. E la subraya cu e diferencia grandi ta cu awendia nos tin mas di 9000 camber disponible y nos poblacion a redobla cu un proporcion di enbehecimento grandi. AHATA na su turno ta indica cu hotelnan lo conoce un recuperacion economico hopi slow. “Aunke cu esaki ta un desaroyo alentador y positivo y cu nos sa cu tur actor ta preparando nan mes di e mihor forma pa ricibi nos bishitantenan, nos no mester perde di bista cu e recuperacion lo bay poco-poco. Caminda cu nos tabata conoce ocupacion di camber di hotel riba 90%, awor e lo ta 20-40% y pa un periodo largo. Esaki tin efecto riba economia, comercio y sector laboral.”
“Esaki ta factornan sumamente importante y mester ta cardinal den e maneho economico riba termino cortico,” e Parlamentario a bisa. Arends ta di opinion cu Gobierno ta dunando mucho tiki atencion ta wordo duna nan e aspectonan aki. “Na momento cu economia cuminsa draai y a base di e pronosticonan duna pa ATA cu AHATA, mester tin un plan di sosten y un maneho cu por wordo ehecuta di biaha pa por compensa parti di falta di actividad economico mirando cu mercado laboral, comercio y economia por lo general lo mester por sostene su mes durante di e recuperacion slow aki.”
“Awe para dilanti di un aeropuerto cu tabata ricibi 25 mil turista pa siman y a partir di luna di juli lo ricibi entre mil pa dos mil bishitante pa siman; unda cu normalmente nos aeropuerto tabata yama bon bini na cas 250 vuelo semanal, e cifranan pa juni y juli lo ta rond di 80 buelo,” Arends a mustra. Tur esaki ta depende di factornan externo cu ta cambia diariamente: e mercado mas importante pa Aruba su turismo, cu ta New York, ta pasando den un aumento enorme pa loke ta trata casonan di contagio di COVID-19.
