Parlamentario Ricardo Croes di partido RED democratico den conferencia di prensa semanal ta elabora riba e tema di vacunacion cu tin un atencion grandi na Aruba y internacional. Den un reunion cu minister demisionario Dangui Oduber a trata e tema di vacuna unda cu a haci diferente pregunta pero lamentablemente te dia di awe no a haya un contesta riba nan manera debe ser.
Sinembargo parlamentario Ricardo Croes kier trece atencion na un punto cardinal cu durante di e reunion den parlamento a trece padilanti cu tin diferente tratamento pa COVID y a papia varios biaha caba riba hydroxychloroquine.
Den e reunion den parlamento a trece e punto aki padilanti y a mustra cu na Hulanda tambe prome cu a bay over pa cera frontera tabata tin dokternan cu ta papia riba hydroxychloroquine como posibel tratamento pa personanan cu a haya COVID y cu ta malo. Den e reunion den parlamento hunto cu Minister demisionario Dangui Oduber e dokter cu tabata cu e mandatario tambe a bisa cu nan a trata pashentnan cu hydroxychloroquine , pero cu tabata tin resultado fatal unda cu hendenan a muri.
Awo e pregunta cu a keda falta pa haci ta cu si tin pashentnan cu a bay hospital pa motibo di COVID y cu nan a muri, cua di e famianan a keda notifica cu nan famia no a muri di e malesa pero di e tratamento cu e la ricibi specificamente cu hydroxychloroquine. Segun parlamentario Croes e dokter a declara den parlamento cu nan a duna e tratamento cu hydroxychloroquine y cu tin hende a muri cu e tratamento aki.
Parlamentario Croes ta considera e declaracion aki hopi serio y ta desea pa un investigacion keda haci pa asina mira ta di unda un declaracion asina aki a sali afo. Segun Parlamentario Ricardo Croes pa por haci un declaracion asina aki mester a haci un autopsia pa asina por declara kico ta e causante di e morto di e pashent sea e ta di COVID of e ta di e tratamento di hydroxychloroquine.
Segun croes na momento cu un pashent muri di COVID autopsia no ta keda haci. Sinembargo e declaracion cu e dokter a duna den parlamento den un encuentro publico cu ta riba un video di parlamento y e ta un declaracion publico, e ora tin e deseo di sa ken tur tin e interes di sa cua ta e pashentnan cu a muri aki na Aruba di hydroxychloroquine.
E parlamentario ta duna di conoce cu te na e momentonan aki cu e ta na altura cu den exterior dokternan cu a trata pashentnan cu hydroxychloroquine tabata un exito. Sinembargo no ta trata solamente pashentnan cu COVID, pero cu asma , presion halto , diabetico , pashentnan riba 90 aña sin cu un di nan a muri.
Parlamentario Ricardo Croes ta desea di sa pa haci un investigacion riba e parti aki debi cu ta cuestiona e echo cu ta trece e informacion aki dilanti den parlamento como un motibo pa descarta e medicamento aki como un solucion y ta declara cu tin pashentnan cu a fayece despues cu nan a keda trata cu hydroxychloroquine.
Parlamentario Croes ta kere cu ta hopi importante pa trece e situacion aki na luz di dia , na atencion di prensa y tambe comunidad di Aruba
