Parlamentario Raymond Kamperveen tocante acuerdo firma cu Eagle LNG: “RAIZ a pidi pa pospone un rato, ban sinta, ban papia over e cos ki y kico ta e intencion”

Despues cu comunidad a haya sa tocante acuerdo entre Eagle LNG y Utilities Aruba NV pa asina completa e proceso unda tin un compromiso pa WEB tuma e gas for di Eagle LNG, parlamentario di fraccion di partido RAIZ Raymond Kamperveen a papia cu Bon Dia Aruba riba e acuerdo aki y e contract cu te ainda no ta conoci.

El a splica cu dia 5 di november el a manda un carta dirigi na minister di Energia Glenbert Croes tocante e situacion di Eagle LNG, Utilities N.V, WEB N.V, RDA na Parlamento di Aruba pero e no a haya un contesta.

Su opinion tocante esaki ta cu e acuerdo a wordo firma for di basta tempo caba, y ta p’esey e motibo cu e kier wak e contract original di e acuerdo aki “no loke nan a firma ayera, pasobra esey ta cera caba y por ta nan no ta bay laga nos wak’e nunca pero esey ta mi presentimento” Kamperveen a sigura.

Asina mes, el a afirma “cu tur respet a mi no a bay na e firma di ayera y a nos (RAIZ) a palabra esey, a nos hasta a pidi nan pa pospone un rato, ban sinta, ban papia over e cos ki y kico ta e intencion pasobra door cu mi no a wak e contract, ¿kico tin su tras?”

El a sigura cu tanto ministernan di RAIZ Ursell Arends y Geoffrey Wever como su persona no a asisti na e firmamento e dia di ayera na San Nicolas pa motibo cu nan no ta di acuerdo cu esaki, nan si ta di acuerdo pa haci cambio den parti di energia sostenibel y den e transicion aki LNG ta aden, pero no pa mara Aruba na un contract di 20 aña.

Pa nan e realidad ta cu nan no sa si gobierno a cera un contract pa pone un barco, traha un pier, traha tubo y pone e tubonan hiba gas di RDA pa WEB, pero nan no sa precies ken ta bay tin mester di e refineria, of kico ta bay pasa cu e luga na unda e refineria tabata anteriormente cu manera el a yam’e “ta un ruina cu e ta kibrando den otro”.

Pero tambe a bin dilanti un otro pregunta, si no ta bay usa e luga aki, ki otro luga nan lo usa pa motibo cu tambe tin otro terenonan liber cerca cu ta yega te lama, si nan ta bay sak’e for di e sistema bieu di refineria y nan lo pone pipanan cu ta core den mesun direccion cu e fuel cu ta bay for di RDA te WEB, den e mesun direccion, “esey ta e preocupacion cu a mi tin, pasobra lo mester tin un super extra safety pasobra e gas ta mas flammable”, Kamperveen a señala.

Bon Dia Aruba a puntra Kamperveen cu e no ta bay ta un deposito di LNG sino di gas natural comprimi, un boter di gas grandi, cu no ta reexportacion di gas. Y si e ta kere den reapertura di refineria y si acaso, si e ta deseabla. Y si no tin refineria anto e volumen di consumo ta baha hopi WEB so, y amortiza e inversion ta bin pa cuenta di e cliente di Web cu ta pueblo.

Pa cu esaki el a contesta cu esey ta un otro pregunta cu e tin pa motibo cu awor nan no ta hedge pa e prijs di gas, nan ta bezig ta hedge cu e volumen cu tin cu bay tuma pa haya e prijs na un miho prijs, “pero e prijs di gas ta subiendo, pero e por baha tambe y e ora ey nos ta perdi pasobra nos a hedge pa 20 aña”, asina mes el a señala cu tin cu bay tuma tanto volumen di gas, pero si Aruba no mester di e resto, ¿kico lo pasa cu esey? ¿ta bay bende? Kamperveen a sigura y door cu e no tin mas informacion, e no por bisa hopi y ta bin dilanti e pregunta: ¿kico ta bay pasa?

E volumen ta duna e siguridad cu Aruba ta cambiando en bes di heavy full oil pa e parti mas ‘green’ aunke esaki ta fossiel fuel tambe, pero e ta mas clean pa motibo cu ta wordo procesa mas lihe y por wordo trata den e sistema di RECIP “Reciprocating Internal Combustion Engines” mas miho cu por wordo balansa, “mi pensamento riba dje ta cu mi no tin problema cu LNG pasobra esaki ta e transicion fuel cu nos mester bay na dje prome cu nos kier cambia pa otro cos tecnologico cu ta bin, pero door di mara nos na 20 aña e pregunta cu ta bin ta ¿nos tin e posibilidad pa haci algo otro como mas molina, nos no tin e oportunidad pasobra nos tin cu paga 80 miyon pa aña y tur hende como pueblo tin cu pag’e”, Kamperveen a bisa.

E situacion di LNG ta den man di Kamperveen na e momentonan aki, pa motibo cu e por bira un parlamentario independiente, un otro opcion ta cu e por benta gobierno abou manera el a sigura cu “mi por bisa mi no ta kere den nan y mi ta bula afo y no tin gobierno, a mi ta esun cu por dicidi”.

Di un forma cu el a sigura di ta sincero, Kamperveen a expresa na Bon Dia Aruba “pa mi ta responsabel, mi ta sincero, mi ta un persona cu ta pensa no pa mi so, mi no ta un hende egoista, mi ta bay keda riba mi punto por ehemplo, cu mi kier informacion y mi kier mi contestanan, si asina no ta bay y bo ta sigui falta mi respet, e ora mi ta bay tuma un paso mas leu y mi lo manda un carta pa minister di Integridad pa exigi un investigacion si e proceso di e cos aki a cana bon, mi tambe por exigi un encuesta parlamentario pa tuma investigacion den parlamento pero mester di mayoria absoluto”.

Un otro scenario cu el a afirma ta pa benta e gobierno abou pero su mes no ta inclina na e banda ey “te ainda” pa motibo cu den situacion cu nos ta cu Hulanda Aruba por bay na mas gasto atrobe, “e ta un decision duro pero mi ta bay stap for stap pa mi por haci mi trabou mas miho”, Kamperveen a sigura.

Tambe a puntra pa Kamperveen si el a logra di haya contacto cu minister Ursell Arends tocante esaki pa motibo cu como RAIZ e ta toca tur dos banda na unda nan a trece dilanti cu “esaki ta un falta di respet pa e plan di gobernacion”, el a finalisa.