Ayera mediante un comunicado di prensa, parlamentario Otmar Oduber (PPA) a critica e partidonan den gobierno y e partidonan den proceso di formacion pa proximo gabinete, acusando nan di nenga di atende e ley di Reino pa supervision financiero na Aruba. “Esnan den gobierno ta ignora e morto y esnan formando e gobierno no kier papia riba e defunto, pero ta pueblo ta esun cu lo tin cu bay entiero si,” el a expresa.
Cu e palabranan fuerte aki, Oduber a referi na un Rijkswet Financieel Toezicht Aruba cu tres fraccion den parlamento ta nenga di atende cune. “Desde un principio a propone un Frente Nacional y ainda ta sigui boga p’e. El a comenta cu tur hende sa den e caso aki cu tin un entiero (1 Mei), pero esnan den gobierno actual no kier anuncia ainda e morto (RAft nobo?) den e caso aki. E otronan cu ta formando e gobierno no kier papia di e defunto (RAft bieu of nobo), pero na final di dia ta pueblo tin di bay entiero, o sea paga e consecuencianan di e Rijkswet aki cu lo keda imponi pa Hulanda.”
Oduber a continua bisando cu Parlamento ta un organo cu ta carga un responsabilidad di defende interesnan di e pueblo y mester actua tambe independiente di gobierno. “Nos ta na un momento unico aworaki pa unifica Parlamento, pasobra no ta cuestion di mustra dede den direccion di niun partido of politico, sino di para pa e derecho constitucional di nos pueblo y e estado di derecho cu tanto a wordo lucha p’e”, asina e lider di fraccion oraño a duna di conoce.
Tin un gobierno cu ta saliendo, uno cu ta bay drenta y tin PPA, cu a bin cu e proposicion aki pa unifica tur, cu e meta di bay Hulanda awo caba y no ora bin e polarisacion pasobra un gobierno nobo a sinta y oposicion ta bay bringa tur loke e gobierno aki kier presenta, segun e comunicado.
P’esey kier un reunion publico cu a pidi mas cu un luna pasa caba, pa yega na un mocion unda cu ta trece aden tur gremio, e diferente instancianan hunto cu gobierno, crea un frente y bisa Hulanda unda nos como nacion kier bay, pero cumpliendo claro cu reglanan y normanan cu nos por hancra den nos propio leynan local. “Hulanda mester compronde y realisa cu Aruba semper a cumpli cu su obligacionnan y nunca a pidi un regalo. Al contrario a paga back semper su debenan na Hulanda y otronan. Cu gobiernonan a faya den cumplimento cu nos reglanan financiero y cu nos a haya nos mes confronta cu un pandemia cruel ta un hecho, pero esaki no por bay a costo di nos derechonan constitucional adkiri. Hulanda mester wordo convenci cu nos tin e madurez pa cumpli cu un refinanciamento di nos debe total y no solamente di e pandemia. Nan mester compronde cu nos tin leynan suficiente unda nos por pone normanan cu por garantisa cumplimento di e refinanciamento aki. Pero esaki sin tin cu mete den nos derechonan adkiri y respetando e estado di derecho independiente dentro di Reino cu no solamente nos a scoge p’e, pero cu nos a acorda tambe riba dje entre tur e partnernan den Reino. Aruba lo mester cumbini “eikmomenten” unda por regularmente midi “toets” e normanan cu nos mes a inclui den nos leynan local acopla na institutonan cu tin cu monitoria y controla e trayecto aki mientras ta logra e metanan proponi.”
Concluyendo, a bisa cu Fraccion di PPA den Parlamento lo bolbe manda un carta pa Presidente di Parlamento urgiendo su persona pa yama e reunion publico aki mas pronto cu ta posibel, mirando e impacto enorme (negativo of positivo) cu e ley di Reino aki por tin riba nos comunidad.
Ley di Reino nobo
Luna pasa despues di su biahe pa Hulanda, prome minister demisionario, Evelyn Wever-Croes (MEP) a causa confusion na momento cu el a declara cu “Gabinete Wever-Croes ta logra pa Conseho di Minister di Reino revoca e ley di RAft.” Sinembargo, den un comunicado di prensa el a clarifica cu “na mei 2024 a yega na un acuerdo cu lo revoca [e RAft] y lo sigui negocia pa yega na un otro tipo di rijkswet.”
Entre tanto, e disputa cu Hulanda pa supervision financiero ta bay algun aña atras, prome cu Gabinete Wever-Croes. Sinembargo, durante tempo di pandemia, Aruba a bay di acuerdo cu lo hinca supervision financiero den un ley di Reino. “Ta importante si pa enfatisa cu Aruba tin supervision financiero cu ta hancra den ley di LAft,” un ley local, manera Wever-Croes a splica den un comunicado di prensa.”
Sinembargo, Hulanda ta insisti riba un ley di Reino, ya cu nan ta preocupa cu Aruba por modifica un ley local di manera unilateral. Awo loke ta den wega ta e interes riba e prestamo cu Hulanda a haci Aruba tempo di Covid. E tempo aya, Hulanda a indica cu nan lo presta Aruba e 916 miyon florin durante Covid na un interes di 6.9%. Si Aruba ta dispuesto pa regla supervision financiero den un ley di Reino, nan lo baha e interes. “E negociacionnan aki ta andando y ta bayendo bon. Si logra pa e ley keda cla y entrega pa 1 di Mei 2025, e interes lo baha na 3.4%” Wever-Croes a indica.
Loke a palabra cu Hulanda mas recientemente ta cu lo keda cla cu un propuesta pa e ley di Reino nobo pa dia 1 di mei na Parlamento di Aruba y na Tweede Kamer. Esaki a keda confirma na medionan local pa Secretario di Estado pa Relacionnan di Reino, Szolt Zsabo, kende a bisa luna pasa cu Hulanda no tin intencion di pospone e fecha aki. “Mi ta spera tambe cu pronto lo tin un gobierno nobo [na Aruba]. Y mientras cu e no t’ey, mi lo sigui negocia cu e gobierno actual,” e Secretario di Estado a bisa.
Mientras tanto, Wever-Croes a bisa cu e negociacionnan ta andando “na nivel ambtelijk y riba nivel bestuurlijk no a cuminsa delibera ainda. E negociacion ainda ta den cuadro di emocion cu parlamento anterior a duna y tardansa den esaki ta mas tanto debi na IMF.” Ta consultando cu Fondo Monetario Internacional (IMF) riba e normanan financiero cu lo duna forma pa e propuesta di ley.
Mirando cu e deadline ta hopi cerca, PPA ta insisti pa atende esaki lo mas pronto posible.
