Ayera a toca turno na St. Franciscus College pa ricibi e grato noticia cu nan tambe lo ser converti den un scol innovativo den e proyecto di E-learning school. Un proyecto cu a cuminsa haya bida cu entrada di mi persona den parlamento unda cu a presenta esaki. Mi ta hopi agradecido na Minister President Evelyn Wever-Croes cu a kere den esaki y hunto cu FUTURA a percura pa ehecucion di esaki cu a bira uno exitoso y sigur awo tin hopi peticion p’esaki.
St. Franciscus College di 4 scol innovativo
Despues di exito grandi di Cacique Macuarima School a sigui Cacique Aterima y Pastoor Kranwinkel y awo a toca turno na St Franciscus College como e di 4 scol innovativo den e proyecto di E-learning ehecuta door di FUTURA. Sigur den e vision di MEP nos lo sigui inverti den e proyecto aki y sigur lo sigui inverti den e preparacion di nos maestronan pa e era nobo den enseñansa. E manera di duna les na e manera cu nos a bin ta haci cu borchi y krijt y copia pronto lo ta pa pasado y unda e proyecto aki ta brinda mas interaccion, mas espacio pa e alumno busca informacion actualisa pero sigur ta haci e dunamento di les mas atractivo.
Banda di e proyecto nan aki di E-learning a percura pa mehora infrastructura di varios scol y unda lo haci mas facil pa por implementa e proyecto aki y sigur den un proximo gobernacion c’un bon planificacion y un presupuesto pa esaki, Aruba den su totalidad lo por disfruta di e proyecto magnifico aki cu sigur lo yuda engrandece nos enseñansa.
Pa termina, awo ta enseñansa su ora, den un manera trankilo y c’un vision clamester por trece cambionan na bienestar di nos muchanan pero sigur tambe na bienestar di nos maestronan.
