Recientemente parlamentario y lider di fraccion RAIZ den Parlamento di Aruba, Misha Raymond, a publica ariba su pagina oficial di Facebook cu e presentacion di PhD candidata Clementia Eugene den parlamento a revela cu 80% di mucha na Aruba ta ser abusa fisicamente.

Raymond ta presidente di e Comision di Asuntonan Social di Parlamento y durante su presentacion PhD candidata Clementia Eugene a resalta cu na Aruba 80% di mucha ta ser abusa fisicamente. Un cifra cu sigur ta alarmante y pa e motibo aki parlamentario Raymond kier

Den su publicacion e parlamentario ta indica cu a haci un encuesta digital na un cantidad di 895 mucha entre e edadnan di 12 pa 17 aña. E edad medio tabata 14.5. E muchanan a ser selecta arbitrariamente entre 11 scol secundario (73 klas) y a representa tur districto di Aruba y 77% di e muchanan ta di Aruba.

El a presenta algun di e resultadonan di e investigacion cu ta lo siguiente: 80% di e muchanan a experencia abuso fisico; 62.2% di e muchanan a experencia abuso emocional; 49.1% di e muchanan a experencia abuso fisico severo; y 20.4% di e muchanan a experencia abuso sexual

E cifranan aki ta berdaderamente alarmante y por deduci cu esaki no ta inclui mucha- y hobennan cu no a participa cu lo por a experiencia algun di abuso y mucha- y hobennan cu tin miedo di bin pa dilanti y vocifera cu nan ta of a yega di ta victima di algun tipo di abuso.

Parlamentario Raymond a indica cu e ta finalisando un ley di iniciativa na unda ta trata di ancra e derechonan di mucha den e constitucion di Aruba. Un di e articulonan den e ley ta stipula cu un mucha tin e derecho di ser protegi contra tur sorto di abuso, cu tambe ta inclui abuso sexual.

El a remarca cu estableciendo e derechonan di mucha den e constitucion di Aruba lo proteha e posicion y derechonan di mucha, mirando cu e constitucion ta e ley di mas halto di e pais.

E parlamentario a expresa cu e ta “lamenta e forma con awendia ta normalisando abuso di mucha.” El a enfatisa cu esaki no ta aceptabel y cu e lo sigui lucha pa sigui mehora e calidad di bida di tur mucha na Aruba.

E tema di abuso di mucha ta hopi popular den comunidad y riba rednan social. Cu algun caso recien cu a causa reaccion grandi di ciudadanonan, manera e caso di maltrato di mucha- y baby na e crèche Pasa Dushi Pasa Pret, y e caso mas recien di un mama cu a denuncia con un homber adulto a drenta den klas na un kleuterschool y dal su yiu un bofta na su cara.

Mas y mas casonan ta keda bin dilanti y hopi ta puntra kico autoridadnan concerni, kico Gobierno di Aruba y kico Parlamento di Aruba ta bay haci pa di berdad proteha e muchanan y evita cu tanto caso di abuso ta tuma luga.