Den un carta entrega 21 di februari 2024, Parlamentario di fraccion RAIZ, Misha Raymond, cu apoyo di su colega Parlamentario di fraccion RAIZ, Raymond Kamperveen y lider di fraccion ACCION21, Miguel Mansur, a pidi na presidente di Parlamento di Aruba un reunion publico pa trata e leynan pa habrimento di matrimonio entre parehanan di mesun sexo.

Den e carta Parlamentario Raymond ta indica desde 9 di october 2023 Parlamento di Aruba a ricibi e nota den respuesta na e rapport riba e proyecto di leynan pa habrimento di matrimonio entre parehanan di mesun sexo. Esaki ta nifica cu e proyecto ta cla pa tratamento, pues e ta “OV-Klaar”, pero te dia di awe, e parlamentario a subraya, no a pone esaki riba agenda pa trata den un reunion publico.

Parlamentario Raymond ta menciona cu anteriormente presidente di Parlamento a duna como motibo pa retrasa e yamada na un reunion publico, cu e tabata kier warda prome ariba e reunionnan di comision cu miembronan manera Darlaine Guedez-Erasmus kier a tene.

“Bo a indica cu bo lo warda e reunionnan aki te fin di januari 2024 (pa cual mi a mustra comprendemento) y cu e tratamento di e proyecto den un reunion publico lo tuma luga durante e prome siman di februari 2024. Sinembargo, ainda no a pone esaki den agenda, aunke mientras tanto a duna un termino rasonabel pa tene e reunionnan relevante di comision,” Raymond a señala den e carta.

El a sigui menciona cu otro motibo cu presidente di Parlamento a duna pa retrasa e reunion publico aki, ta cu e ta den spera di e decision di Hoge Raad riba e casacion di Land Aruba contra Fundacion Orguyo Aruba tocante matrimonio entre parehanan di mesun sexo.

E Parlamentario a recorda den su carta cu pais Aruba a duna como motibo pa casacion cu huesnan (Hof di Husticia di Aruba,Corsou, Sint Maarten y di Boneiro, Sint Eustatius y Saba) a sinta riba stoel di legisladornan (Gobierno y Parlamento di Aruba). El a agrega Gobierno di Aruba tambe a indica cu e ta warda riba Parlamento pa trata e proyecto di leynan pa habrimento di matrimonio entre parehanan di mesun sexo, y si Parlamento aproba e proyecto, nan ta coopera pa su ratificacion.

“Cu esaki, e responsabilidad di legislador di Aruba ta den man di e Parlamento pa ehecuta su trabou y cumpli cu su tareanan. Manera cooperador di ley, e Parlamento mester expresa nan mes tocante e propuesta. Esaki ta e rol cu nos como representantenan di pueblo mester yena den nos sistema di democracia y estado di derecho,” Raymond a enfatisa.

El a remarca cu e legislatura di Aruba ta wordo forma pa Gobierno y Parlamento, pero cu pueblo di Aruba no ta wordo sirbi na un manera adecua. Di un banda gobierno ta bisa cu e podernan hudicial a bay mas leu cu nan mester y di otro banda Parlamento ta warda riba e podernan hudicial pa ehecuta nan tarea di legislador.

Raymond ta enfatisa cu pa medio di un reunion publico—cu deliberacion, debate, votamento, y posibel cambio- y mocionnan—ta duna e cumplimento necesario na democracia di Aruba. Durante un tratamento publico, cada miembro di Parlamento por expresa nan argumentonan y motivacion, nan por haci pregunta y vota sin ningun influencia.

“Hunto cu e firmantenan di e carta aki, mi ta pidi pa yama un reunion publico pa trata e proyecto di ley inicial di Landsverordening pa cambia e Burgerlijk Wetboek di Aruba y algun ley di teritorio relaciona cu e habrimento di matrimonio pa personanan di mesun sexo y e ya caba elimina inhabilidad di hende muhe casa pa ehecuta algun actonan legal (Landsverordening openstelling huwelijk). Teniendo na cuenta artíkulo 23, di tres paraaf, di e Reglamento di Orden pa Parlamento di Aruba, ta wordo pidi pa e reunion publico tuma luga dentro di 30 dia despues di e peticion aki,” Raymond a finalisa e carta.

Manera ta conoci dia 6 di december 2022 corte comun a dicta dos sentencia relaciona cu casonan di parehanan di mesun sexo. Un di e veredictonan aki tabata pa Aruba y esaki a indica cu parehanan di mesun sexo por casa na Aruba.

Na Aruba ta trata di un caso cu Fundacion Orguyo y un pareha di dos hende muhe a entama contra pais Aruba. Fundacion Orguyo pa algun tempo caba ta vocifera nan lucha pa igualdad completo pa e comunidad LGBTIQ+. Esaki sin duda ta un logro pa e fundacion y e comunidad.

Despues di e veredicto aki Gobierno di Aruba a anuncia mediante un comunicado di prensa dia 24 di februari 2023 cu a base di e consehonan aki a tuma e decision pa bay den casacion contra e punto cu corte a bay sinta riba e stoel di gobierno. Gobierno di Aruba ta haya ta importante pa haya claridad si e forma con corte a duna contenido na e “rechtsvormende taak” (tarea legal), ta corecto.

Despues di esaki, dia 10 di november di aña pasa a tuma luga na Den Haag den Corte di Casacion e tratamento oral di e casonan di Aruba y Corsou tocante e apertura di matrimonio pa parehanan di mesun sexo. Pa Aruba tabata trata di e caso di Fundacion Orguyo contra Pais Aruba.

E abogado mr. Jan Paul Heering, ken a papia pa Gobierno di Aruba, principalmente a presenta obhecionnan legal formal, enfatisando cu e huesnan di Corte incorectamente a asumi e rol di legislador.

Mr. Mirto Murray, mr. David Wever y mr. Ton Vermeulen, representando gruponan defensor di derechonan LGBTQI+ a traves di Human Rights Caribbean Foundation y Fundacion Orguyo Aruba, a argumenta cu tin “discriminacion sistematico” di gobiernonan di Corsou y Aruba, haciendo parehanan di mesun sexo “ciudadanonan di segunda clase” sin e mesun derechonan cu parehanan casa.

Ainda no tin veredicto ariba e caso aki.