Parlamentario Misha Raymond: “Pa mi por sostene e ley awe cu ta promove prosperidad, mi kier wak logopedie bira un realidad cu urgencia”

Diaranson den Parlamento di Aruba e tuma luga e tratamento di e ley di BBO na frontera, cual a keda aproba cu 11 voto na fabor y 9 contra. Parlamentario Misha Raymond di fraccion RAIZ ta un di e parlamentarionan cu a vota na fabor di e ley aki, pero no prome cu el a clarifica cu e no ta sostene e ley di BBO na frontera si e no bay man den man cu e ley di logopedie.

Durante su argumento, parlamentario Raymond a remarca cu e ley di BBO na frontera ta promove prosperidad, pero cu e ley mester bay man den man cu bienestar.

El a splica cu dia 9 di november di aña 2021 el a entrega un mocion pa inclui logopedie den e pakete basico di AZV. Segun el a indica, casi tur instancia cu ta atende cu mucha cu tin necesidad special, e desaroyo di nan habla ta atras y esaki ta un parti hopi importante pa e muchanan por participa den e bida social.

Raymond a sigui splica cu dia 9 di maart 2022 mi el manda un carta na minister encarga pa puntra tocante con leu e proceso di e ley di logopedie ta y segun el a indica ariba e carta aki el a haya un contesta. Ariba dia 3 di augustus 2022 y 13 di juni ultimo, Raymond ta señala el a bolbe manda un carta pa wak con leu e proceso ta pa hinca logopedie den e pakete basico di AZV.

El a informa cu e ley pa introduci e cambionan aki a bay Raad van Advies cu a duna nan conseho di 26 di april, 10 siman pasa.

“Cu e mesun urgencia cu nos ta tratando BBO awe, mester trata tambe logopedie. Pa mi por sostene e ley awe cu ta promove prosperidad, mi kier wak logopedie bira un realidad cu urgencia,” el a resalta.

Raymond a subraya cu prosperidad no por bay ariba di bienestar y sin un compromiso por escrito (schriftelijke toezegging) di gobierno, di minister encarga, el a enfatisa, e ley no por bay na vigor prome cu esun di logopedie. “Preferiblemente conhuntamnte cu e ley di BBO, mi kier wak esaki bira un realidad. Si no mi no por sostene e ley,” el a agrega.

Na final Raymond a ratifica loke el a indica durante su argumento di prome y segunda tanda, cu e no por sostene ley di BBO na frontera si esaki no bin man den man cu e ley di logopedie.

Pa finalisa el a indica cu segun el a compronde e compromiso por escrito (schriftelijke toezegging) a yega y p’esey el a vota pro e ley di BBO na frontera.