Desde cu e ley di privatisacion di plantanan di RWZI a drenta na vigor dia 1 di juli, e proceso di cobransa di e sustainability fee a traves di e ED-Card tambe a drenta na vigor, pero ainda e proceso aki ta encontrando obstaculonan. Den cuadro di esaki, parlamentario y lider di fraccion RAIZ, Misha Raymond, a dirigi un carta cu varios pregunta na minister Ursell Arends pidiendo clarificacion riba e proceso cu te ainda no ta canando 100%.

Den un entrevista cu Bon Dia Aruba, parlamentario Raymond a splica cu su persona tambe a tuma nota riba diferente medionan social cu tabatin preocupacion pa loke ta trata e sustainability fee y e prijs cu ta cobra turistanan of esnan cu no ta residente pa drenta Aruba.

Mirando e preocupacion y falta di claridad pa loke ta trata e proceso aki, el a cuminsa cana e canalnan necesario y a haci un total di nuebe pregunta oficial na minister Arends relaciona na e topico sustainability fee y plantanan di RWZI.

E parlamentario a puntra kico ta e suma exacto cu ta cobra turista, el a puntra e minister si ta na altura cu tin pasaheronan cu por ta pagando mas cu 20 dollar ora nan drenta, y si esey ta e caso, si e por splica pakico e prijs ta pasa 20 dollar pa pasaheronan cu ta drenta Aruba.

Parlamentario Raymond a sigui splica cu el a puntra tambe den caso cu e minister tabata na altura cu esey tabata sucediendo, kico ta e pasonan cu el a tuma den su maneho pa rectifica esaki y ki pasonan el a tuma tambe pa compronde dicon esaki ta pasando.

Algun pasahero a paga 22.75 dollar, en bes di 20, y den cuadro di esaki el a puntra e minister si e pasaheronan cu a paga mas di 20 dollar, den caso cu e no tabata corecto, si e pasaheronan aki lo haya e diferencia, e 2.75 dollar, back.

Manera ta conoci e sustainability fee cu ta drenta tin e obhetivo pa bay pa e plantanan di RWZI, pa restaura esakinan of pa haci loke ta necesario pa trabounan por sigui. Otro pregunta cu e parlamentario a haci na minister Arends ta kico ta e ultimo desaroyonan cu tin pa loke ta trata e trabounan na e tres plantanan aki.

Fuera di esey, Raymond a indica, cu el a ilustra tambe cu durante e tratamento di e ley el a entrega un amienda riba e ley y e amienda ey ta indica cu studiantenan cu ta afo cu ta bin Aruba no mester paga. El a puntra e minister concerni si e esey tambe ta e caso cu ta pasando aworaki.

“Mi kier haya contesta riba e preguntanan pasobra mi ta kere cu si bo pasa un ley unda bo ta pone cu e sustainability fee ta 20 dollar, no tin pakico considera cu por tin un costo di administracion, mester splica esey hopi bon. Como parlamentario mi mester sa precies kico mi a vota p’e,” el a remarca.

Por ultimo, parlamentario Raymond a indica cu e preguntanan a ser registra dia 15 di juli y aworaki tin un periodo di espera di alrededor di dos pa tres siman pa ricibi contesta di parti di minister Arends riba e preguntanan aki.

Desde comienso, desde e fecha di introduccion di e ley, e proceso alrededor di e cobransa di e sustainability fee aki tabatin diferente fayo. Bon Dia Aruba, como tambe diferente medionan di comunicacion, a reporta esaki. Riba dia 1 di juli mes e implementacion di sistema di pago no a keda cla pa introduccion y a tarda algun dia pa esaki por a cuminsa traha.

Bon Dia Aruba a tuma contacto cu un representante di Utilities Aruba NV pa puntra kico tabata e motibo cu e sistema di cobransa no a ser introduci riba e fecha cu mester a haci esaki.

Di parti di Utilities Aruba NV a ricibi respuesta cu tabatin  un retraso den e implementacion di e proceso di pago y cu tur persona no residente mester a yena e ED Card normal y unabes cu e proceso di pago ta implementa e lo bira visibel den e app.

Despues di algun dia en berdad esaki tabata e caso, pero hunto cu e implementacion a bin otro fayo, cual tabata e suma di e cobransa. Manera menciona e ley ta indica cu e sustainability fee tin un costo di 20 dollar. E prome dianan despues di e implementacion, ariba rednan social diferente persona a menciona cu e cobransa tabata 22.75 dollar y no 20 dollar.

Pa esaki tambe Bon Dia Aruba a bolbe tuma contacto cu Utilities Aruba NV pa puntra kico ta e motibo cu ta cobrando 22.75 dollar, pero te dia di awe no a logra haya contesta.

Recientemente tambe riba rednan social, specificamente den gruponan di turista cu ta biaha pa Aruba, por a tuma nota, basa riba comentarionan, cu e proceso di cobransa di e sustainability fee ainda tin fayo.

Tin turista cu ta conta cu nan a haci e proceso pa nan ED-Card y no mester a paga nada y tin ta conta cu nan ta haci e proceso di ED-Card pa henter un famia, pero solamente mester a paga un biaha so e 20 dollar di e sustainability fee, siendo cu e cobransa ta pa cada persona cu ta riba 8 aña di edad.