Diaranson ultimo 20 di november, riba Dia Internacional di Derechonan di Mucha parlamentario y lider di fraccion RAIZ, Misha Raymond a entrega un iniciativa di ley pa hancra derechonan di mucha den Constitucion di Aruba, un proyecto cu e tin hopi tempo trahando riba dje.

Raymond a splica cu e ley di iniciativa cu el a entrega na presidente di Parlamento di Aruba, Raymond Kamperveen, ta pa hancra e derechonan di mucha den e Constitucion di Aruba. Un trayecto, el a indica, cu ta basta largo y cu a cuminsa cu un idea y despues a formalisa diferente conseho, no solamente for di Universidad di Aruba pero tambe for di Universidad di Leiden.

El a sigui splica cu e ley ta consisti di diferente articulo y e obhetivo di ley pa inclui e derechonan aki ta pa un miho proteccion pa e muchanan. Raymond a sigui splica cu nan a wak den diferente ley na Aruba den cierto articulonan ta toca e tema di derechonan di mucha, pero el a enfatisa cu e importancia di hancra esaki den e Constitucion tin “un efecto enorme pa con nos muchanan ta wordo protegi, con decision ta wordo tuma ora ta toca nan y con e debatenan mester wordo hiba ora ta trata maneho pa proteccion di nos muchanan.”

Parlamentario Raymond a enfatisa cu muchanan merece proteccion special. El a splica cu e ta bisa esaki pa motibo di nan posicion hopi fragil unda nan ta depende di nan contexto, di nan famia, di gobierno, instancianan, di maneho pa nan haya oportunidad pa desaroya di tal forma ta pone nan den un posicion fuerte den comunidad. “Esey ta e rason y e motibo pakico nan mester wordo reconoci como suhetonan cu tin derecho y nan derechonan mester wordo miho hancra,” el a agrega.

Pa loke ta e ley mes, el a splica cu e tin diferente articulo y ta cuminsa cu e definicion di kico ta un mucha, y esey ta tur persona bou di 18 aña. Fuera di esey e ley ta inclui articulonan cu ta boga pa derechonan di mucha pa no ser abusa, ni fisicamente, ni psicologicamente, ni emocionalmente, pa no ser neglisha pero particularmente pa nan no ser abusa sexualmente.

“Dicon esaki ta asina importante pa pone como derecho constitucional? Esaki ta habri tur discusion pa maneho di leynan cu mester wordo reforma pa duna proteccion constitucional pa nos muchanan,” Raymond a resalta.

El a sigui splica cu ora nan a cuminsa cu e ley aki, nan a bay den combersacion cu Universidad di Aruba, a haci un conseho preliminar pa wak si tin balor agrega pa bin cu un ley asina ki y e conclusion tabata cu si. Fuera di esey na Universidad di Leiden un hoogleraar cu ta involucra cu ley aki tambe a indica cu si Aruba logra esaki, Aruba lo ta pionero den Reino pa locual ta derechonan di mucha y lo sigui desaroyonan mundial caminda por wak caba den ki direccion nan ta bay pa inclui derechonan di mucha den Constitucion.

Ademas, si Aruba logra hancra e derechonan di mucha den e Constitucion, e lo tin e derechonan miho hancra cu Hulanda, Corsou y Sint Maarten. “Esey mi ta kere ta algo hopi bunita pa Aruba,” el a expresa.

Fuera di esey, Raymond a sigui splica, e ley tambe ta inclui un articulo cu ta boga pa muchanan no ser discrimina, cual ta un articulo hopi importante. El a indica cu ta papia di inclusion di muchanan cu tin problema den nan desaroyo, problema pa ser inclui no solamente na scol, pero tambe den actividadnan social y e articulo aki lo forma un parti derecho constitucional.

Otro articulo den e ley ta cu muchanan tin derecho di expresa y duna nan opinion. Raymond a splica cu e ley ta stipula cu maneho mester tene consideracion cu loke nan kier, cual el a señala algo bunita pasobra e ta relaciona na e tema di e aña aki di Dia Internacional di Derechonan di Mucha cu ta bisa: “scucha e futuro, para pa derecho di mucha. Scuchando muchanan nos por cumpli cu e derecho di expresion propio, compronde e ideanan pa un miho mundo incluyendo prioridadnan den nos accionnan awe. Esey ta locual nos ta haciendo awe tambe,” el a resalta.

Fuera di esey, e parlamentario a agrega, e ley ta inclui tambe tareanan cu gobierno mester cumpli cune y cada tres aña nan mester indica den un rapport kico nan a haci of a bin ta haci pa cu derechonan di mucha.

Pa logra yega na e iniciativa di ley aki, Raymond a indica cu tabatin diferente hende, diferente instancia cu a yuda y diferente combersacion cu a tuma luga, specialmente na Hulanda, entre otro cu UNICEF.

“E ley aki ta marca e prome paso, un paso sumamente importante pa duna nos muchanan un miho representacion den maneho, pero tambe un voz di berdad pa locual ta nan derechonan cu mester cumpli cune. Si nos ta papia di duna un miho proteccion, esaki ta e prome paso cu nos tin cu tuma,” el a subraya.

Presidente di Parlamento di Aruba, Raymond Kamperveen, a ricibi e iniciativa di ley y a expresa cu ta un hecho importante pa Aruba. “Cu Hulanda mes no tin’e ainda, Corsou no tin’e, Sint Maarten no tin’e, esaki ta un stap grandi pa tur den Reino pa nan sa cu nos tin cu para pa nos muchanan y ki mas miho cu haciendo e den ley y hancrando e den nos constitucion,” el a bisa.