Parlamentario Mike de Meza(AVP): Minister buscando credibilidad financiero pero habracando esun di henter pueblo

Den historia di Reino Hulandes, no tabatin y lo no bay tin nunca mas un gobierno asina poetico manera gabinete Wever Croes, ya cu ora cu scucha e Ministernan papia di medida tras di medida cu nan ta suta pueblo cune, nan ta haci esaki den un forma poetico, tratando na convence un pueblo cu ta sufriendo bou di su maneho.

Miembro di fraccion di AVP ing Mike de Meza ta kere cu e momento a yega pa Gabinete Wever Croes, en realidad cuminsa pone pueblo central, traha pa interes di pueblo, traha pa drecha nivel di bida di pueblo den su totalidad.

“Por ehempel ora cu nos scucha con Prome Minister y su gobierno ta trata di convence pueblo cu rancando placa for di nan cartera ta algo bon y necesario, ta lanta e pregunta ta kende nan ta trata di convence.

Minister Xiomara Ruiz Maduro a trata na hustifica un suma di casi 90 mil florin na biahe cu el a haci, cu esaki tabata necesario ya cu e tabata trahando pa logra drecha credibilidad financiero di su gobierno.

Prome Minister ta pidi pueblo pa para hunto, traha hunto pa logra e recuperacion financiero cu su gobierno tin visualisa pero henter e proceso aki di recuperacion financiero, ta dirigi solamente riba cartera di pueblo y cartera di sector comercial.

Ministernan mes di gabinete Wever Croes ya caba a gasta alrededor di 6.4 miyon florin den menos di dos aña di tempo, pa biaha rond mundo mientras cu pueblo ta sinta na cas ta conta kico a resta fin di luna despues di tanto medida, tanto inflacion cu a converti nan bida den un caos financiero increibel.

Minister di Finansa ta contento cu tanto IMF como Standard & Poors a eleva e rating financiero di Aruba di negativo pa positivo, lubidando di menciona cu su persona y su gobierno a sigura e dos instancianan aki, cu nan lo sigui introduci mas medida pa saca mas placa di pueblo.

No solamente esey pero practicamente Gabinete Wever Croes ta bay den historia pa converti Parlamento den pronkstuk di gobierno cu no tin nada di bisa si e gobierno no bisa kico nan tin cu haci.

Tanto IMF como Standard & Poors ta mustra den nan evaluacion cu Gabinete Wever Croes lo sigui introduci otro pakete di medida pa haya mas entrada y ta trata di convence un pueblo cu a perde hopi caba den ultimo dos aña, cu tur cos ta ok, cu e medidanan aki ta bon pa pueblo mes.

E falta di sinceridad di Gabinete Wever Croes ta alcansando proporcionnan hamas bisto ya cu den protocol firma cu Hulanda, a sigura gobierno di Reino cu lo introduci un serie di medida contra pueblo, caminda entre otro ya ta papia cu si cumpli cu exigencianan di CFT pa reduccion di gasto, esaki lo nifica cu e Plan Social di gobierno, lo no por sigui.

Un declaracion cu ta mustra cu ta pidi pueblo comprension, cu ta pidi pueblo pa acepta cu lo bin otro pakete di medida y pa bisa pueblo cu e tin cu entrega ainda mas placa di loke ya caba nan a entrega den ultimo 20 lunanan.

Na momento cu Gabinete Wever Croes manda e señal aki cu e Plan Social ta na peliger, ta mescos cu nan bisa den mesun rosea cu indexering cu sindicatonan ta exigiendo tampoco lo por wordo logra y cu reparatietoeslag tambe ta na peliger y otro beneficionan cu gobierno di AVP a introduci pa esunnan di menos entrada, lo no por ta posibel mas.
Prome Minister a priminti cu su gobierno lo no tuma medida contra pueblo pa drecha e situacion financiero pero su gobierno tin dos aña sutando pueblo cu medida, cu e lo reduci e cantidad di Minister bek na 7 pero tampoco a cumpli cu esaki, cu e reduci personal di gobierno pero CFT y otro instancianan a mustra cu al contrario, mas trahado a wordo tuma den servicio.

Credibilidad financiero di pueblo ta na werki pero credibilidad financiero di friends & family, di sponsor y sostenedonan di partido, si ta floreciendo y den tur esaki ainda Prome Minister y Minister di Finansa ta pidi pa para hunto pa atende cu e retonan aki, algo cu pueblo simplemente no por sostene of tolera mas.

E momento a yega pa gabinete Wever Croes cuminsa drecha credibilidad financiero di pueblo y no solamente pa famia y amigonan,” Parlamentario Mike de Meza a señala.