Parlamentario Mikde de Meza(AVP): ‘Prome minister ta confirma cu no ta bay sigui cu reapertura di refineria’

ORANJESTAD – Den forma categorico prome minister Evelyne Wever Croes, a mustra cu su gobierno no ta interesa den sigui cu e proceso di reapertura di e refineria na San Nicolas ora cu el a declara siman cu a pasa, cu nan lo bay Merca y haci ultimo intento pa logra esaki.

Miembro di fraccion di AVP, Mike de Meza a mustra cu ya caba el a mustra riba esaki anteriormente, esta cu gabinete Wever Croes lo keda na bisa solamente si bay di acuerdo pa no laga e refineria habri.

“Nos a bisa bon cla caba, cu existencia di coalicion MEP-POR-RED a depende di e refineria ya cu e partido mas grandi den e coalicion aki, tin cu bay na amen di e partido POR su lider, kende kier mira su proyecto di hotel na San Nicolas wordo ehecuta.

Siman pasa caba prome minister a mustra malo ora cu Corsou si a logra na yega na un acuerdo cu departamento di estado Mericano, pa coopera pa asina PDVSA por los fondonan cu tabata necesario pa e sigui funciona.

Esaki a wordo logra a base di esfuersonan haci pa tanto gobierno di Corsou como otro 6refineria di Corsou.

Sinembargo aki na Aruba tabata bisto cu gabinete Wever Croes no tabatin nocion di loke nan tin cu haci, no tabata sa nada pero net nada di e refineria ya cu nunca antes nan a pone atencion na e proceso aki y solamente a haci politica barata cu e proyecto aki.

Awor algun dia despues cu gobierno di Corsou a anuncia cu el a yega na un solucion cu autoridadnan Mericano, diripiente prome minister Wever Croes ta declara cu un delegacion di Aruba lo sali rumbo pa Merca pa haci ‘ultimo’ intento pa logra haya un solucion pa e refineria di Aruba.

Pero aki tin cu pone bon atencion na e hecho cu ningun hende sa kendenan ta forma parti di e delegacion aki, no ta conoci si tin representantenan di Citgo den esaki, pues ningun hende sa kico e delegacion misterioso aki a bay haci.

Prome minister no a duna informacion concreto di kico e mision di ultimo recurso aki ta bay trata di logra pero si ta bisa cu esaki ta ultimo intento, loke nos ta kere cu aki poco dia gabinete Wever Croes lo bin bek y anuncia cu e proceso di reapertura lo termina.

Fuera di e bishita kamikaze aki cu prome minister ta manda Merca, a keda confirma siman pasa ora cu e documento di e plan economico di gobierno a wordo presenta, no ta menciona ningun caminda algo riba e refineria, pues e refineria no ta conta den e plan economico di gabinete Wever Croes pero prome minister ta sigui hunga su comedianan y ta sigui gaña pueblo.

E momento a yega pa prome minister bin dilanti y bisa pueblo e berdad, sikiera pa un bes desde cu el a bira minister presidente, sea sincero cu pueblo y bisa tur hende cu refineria di San Nicolas tin cu cera pa cumpli cu exigencia di lider di POR cu ta dicidido pa ehecuta e plan di construccion di un hotel na San Nicolas.

Futuro di Evelyne su gabinete ta depende di e decision aki ya cu si no cumpli cu e exigencia di e lider blauw, gabinete Wever Croes ta bay cas y tur cos a caba pa prome minister.

E falta di sinceridad aki, e falta di respet pa pueblo di Aruba, ta sigui manifesta su mes mas tanto den maneho di e pais, caminda tur hende por bisa e balor economico di logra reapertura di e refineria, kico e lo nifica no solamente den e aspecto economico, pero tambe pa loke ta e aspecto laboral pero awor tur esaki ta bay perdi ya cu interes politico di partido MEP, manera semper ta bin na prome luga, prome cu interes di nos pueblo,” parlamentario Mike de Meza a declara.