Parlamentario Michael Lampe (AVP): ‘Crisis actual no tin espacio pa polarisacion politico innecesario’

Henter a crisis cu Aruba a pasa aden ocasiona pa e covid-19, ta algo cu bay tin su efectonan pa un tempo largo ainda y segun miembro di fraccion di AVP, Michael Lampe e ta kere cu si tur hende para hunto den e lucha aki, pero hunto lo logra sali for di e situacion dificil aki.

“Ta un situacion dificil pero mi ta kere cu hunto nos lo logra supera e situacion aki cu un Aruba cu mi ta kere mester por para pa su potencialnan.

Ta tristo si pa tuma nota ora cu hopi di e politiconan hoben kendenan ta dunando sosten na gobierno, netamente ta vocifera un rato cu Aruba mester ta uni den e periodo dificil aki pero di otro banda durante un reunion riba e situacion actual, ta bay bek den historia di partidonan pa di e forma aki sigui promove polarisacion atrobe.

Insistiendo riba discusionnan entre partidonan politico na luga di insisti riba union pa haya e miho forma pa saca e pais dilanti para hunto den e tempo dificil aki y asina nos como pais por ta mas fuerte para riba e relacionnan cu tin actualmente cu Hulanda.

Sigur na un momento caminda por mira den medionan di comunicacion caminda for di Hulanda politiconan ta insisti cu e islanan Hulandes den Caribe no por percura pa nan mes, cu no ta sirbi nan propio interes, netamente e mentalidad politico aki demostra den e prome parti di e reunion di diaranson, ta yuda sostene e pensamento eroneo aki na Hulanda.

Parlamento a reuni cu Minister Presidente y Minister di Finansa riba e situacion delicado y dificil actual pero loke algun di e miembronan cu ta sostene gobierno, a concentra mas tanto pa conta parti di historia nan di pasado, cual gobierno a haci mas y cual gobierno a haci menos of nada.

E tipo di mentalidad politico aki tin nos pueblo cansa, nos hobennan cansa di scucha e tipo di discusionnan aki cu no tin sentido y cu no ta sirbi ningun interes na e momentonan aki, cual nan sigura no ta hiba nos pais dilanti na e momentonan aki.

Den mi disertacion mi a mustra riba e asunto aki enfatisando cu e tipo di polarisacion aki ta hiba eyfo un mensahe di Aruba den e relacion cu Reino, cu Hulanda por causa dañonan cual nan lo por wordo coregi mas ya cu den e debatenan politico di partidonan, e tipo di polarisacionnan aki ta causa ainda hopi daño na imagen di nos pais.

Tas un punto importante cu nos tin cu pensa riba esaki tambe ya cu na final di dia, si bo a un Arubiano di berdad, bo ta pensa cu ta necesario pa nos hiba debatenan den parlamento.

Ta necesario pa nos cuestiona otro riba e direccionnan cu nos kier bay, ya cu esey ta democracia pero ora cu constantemente por scucha cu ta culpa di esey, culpa di e otro sin cu duna un aporte na un solucion berdadero, e ora bo ta cortando bo propio pianan den e forma con nos por para fuerte como comunidad y sigur representando e comunidad.

Den pasado nos por a wak cu e tipo di polarisacionnan aki no a hiba e pais ningun caminda y sigur nos no por mester sigui hiba e tipo di discusionnan negativo aki y sigur nos comunidad no por wordo perhudica pa motibo di discusionnan sin sentido a base di color politico.

Den pasado tin hopi partido, sea MEP, AVP y otronan, tambe a haci nan mes culpabel pa polarisacion den politica aki na Aruba caminda lo a hiba un imagen robes afo di cosnan cu ta pasando entre politiconan y esunnan cu a haci fout meter paga pas esaki pero tambe tabatin hopi politico kendenan a traha duro den pasado y nan kende nos tin cu duna nan respet.

Y esey ta di tur partido, hendenan cu mientras cu nan tabata den gobierno, a haci nan maximo esfuerso pa logra lo mihor ya cu nan a kier den Aruba su potencial nan, kere den nos hendenan, a kere den e relacion cu Reino.

Hopi biaha den pasado tin partidonan cu a busca netamente e potencial den e relacionnan aki pa asina crea un miho relacion caminda nos por traha miho cu otro riba diferente tereno pero tin otro partidonan cu ta insisti riba confrontacion cu Hulanda riba diferente punto cu ta diferencia nos.

Nos tin cu puntra nos mes e ora na unda nos kier bay ya cu nos a un isla chikito loke no kier men nos mester ta na rudia of roga pa algo pero si e ta nifica cu mester bay wak realisticamente, lagando color politico un banda, lagando partidonan un banda y busca e mih forma con nos por traha hunto a base di e potencialnan den e relacion cu nos tin cu otro, y asina logra resultadonan positivo.

Trahando hunto pa un miho futuro ta rekeri stop di biba den pasado, stop di poliralisa un situacion cu na e momentona naki no ta rekeri un acercamento asina pero sin duda e lo sirbi interes di nos pais si nos para hunto y enfrenta e situacion dificil aki den union pa asina logra e miho solucion posibel,” Parlamentario Michael Lampe a declara.