Recientemente a tuma luga lansamento di proyecto “Nexus 1492”. E proyecto ta midi impacto di colonialismo riba tradicionnan y herencianan cultural di cada pais. Parlamentario Michael Lampe a presencia e evento pa personalmente felicita e Arkeologonan local cu a haci un tremendo trabou, mescos cu e team completo di profesionalnan di Museo.
A explora diferente capa di nos historia, un oportunidad valioso caminda por a haci uzo di diferente tecnologia, bou guia di expertonanan internacional y descubriendo historia adicional cu no tabata conoci. Diferente sondeo di areanan di Aruba a trece claridad y habri mas porta pa nos arkeologonan sigui busca mas informacion riba e historia di unda nos a bin y e efectonan cu a crea tradicionnan den pasado y yega unda nos ta awe. E sondeo mester produci contesta riba entre otro ken tabata biba na Aruba.
Un anochi yena di inspiracion, creando un biaha mas e “Highlight” con importante ta pa cuida nos naturalesa. E anochi aki por a aprecia cu Aruba completo ta warda historia den nos tera y e importancia di traha/explora y brinda nos arkeologonan espacio pa por traha prome cu nos bin cu modernisacion den infrastructura. Nos lo tin cu salvaguardia tur locual nos tera tin pa descubri ainda den dje, asina parlamentario Michael Lampe a bisa.
Di su banda Michael Lampe a remarca tambe di e impacto cu e diferente nacionalidadnan cu ta biba riba nos isla, su diversidad y con nan ta move, habriendo wowo di hopi hende. E lasonan Caribeño ta algo cu ta uni tur e islanan y kisas den e buskeda aki, e proyecto a produci informacionnan clave di e influencia di pasado den nos region, cu ta uni nos den tradicionnan y nos cultura presenta den un bunita proyecto cu ta mustra e lasonan cu ta enrikece nos historia.
