Parlamentario Mervin Wyatt-Ras a tuma nota di rapport cu minister di Asuntonan Social y Labor a entrega na Parlamento titula “Rapportage Uitvoering van het Sociaal Crisisplan over de periode 1 november 2018 en 2019 en een vooruitzicht voor 2020 en 2021”.

Den e rapport ta duna bista di e proceso di ehecucion di e fondo crea pa atende cu e area social. Ta trata di un suma di 18.5 miyon florin pa aña 2019. Den e rapport ta sali for di un zgn. situacion di crisis, esta un situacion cu supuestamente lo mester actua de inmediato. Ta sali for di un situacion den cual tin un promedio di 24 caso pa luna di abuso sexual. Alabes ta sali di un situacion di 150 caso promedio di violencia domestico. Aki e minister encarga cu Asuntonan social a uza loke a pasa cu 2 mucha pa declara cu tin crisis y cu mester actua mesora. Dor di presion a presenta un begrotingsfonds pa cual gobierno a haya aprobacion den Parlamento y por uza 18,5 miyon florin. A nombra ya caba 41 persona. Sinembargo den practica e resultado ta diferente. Den su prome reportahe na Parlamento minister a trece padilanti cu den e prome lunanan di 2019  el a uza solamente 12% di e suma den e fondo y a logra baha e lista di espera di dos aña di Sociale Zaken cu 60%. Si esey ta e caso por conclui cu djis uzando mita di e placa cu a destina pa e plan social lo por baha e lista di espera completamente.

Kiermen no tabata necesario tanto placa? Awor despues di mita aña den e reportahe di dos kwartaal minister mes ta indica cu solamente 3 di e 31 proyectonan (9.7%) ta bay bon, mientras cu den (90.3%) di e proyectonan segun e rapport instancianan no por cumpli cu e programa vereisen. Esakinan ta rekisitonan. Pues contrario na e pensamento di un crisis e instancianan aki no ta hayando e ayudo necesario mesora pero tin cu pasa un caminda di cruz pa haya placa. Paso nan tin cu cumpli cu criterianan. For di esaki por saca afo cu no tabatin ningun crisis sino cu esaki a ser crea pa haya placa. Paso crisis ta rekeri accion mesora. Den reaccion di CAft riba e uitvoeringsrapportage 2019 e ta critica e aspecto financiero di “Crisisplan” netamente nombracion di personal.

CAft ta indica cu e post di personal den presupuesto 2019 no por surpasa 479 miyon florin. Esaki pasobra gobierno incluyendo e minister di Asuntonan Social a firma un protocol cu Hulanda sin consulta prome cu Parlamento. Aki e mesun Minister a bay di acuerdo cu algo cu e no ta cumpli cune. E rapport di ehecucion di presupuesto di aña 2019 ta mustra cu den gastonan ya a yega na e suma di 478.5 miyon. Sociaal crisis plan ya caba a haci uzo di 1.2 miyon den 2019 pa nombracion di personal. Tin espacio ainda den e fondo di un suma di 3.4 miyon pa personal. Sinembargo CAft ta considera gastonan di personal cu ta ser financia dor di Crisisplan como gastonan di personal di presupuesto di pais Aruba cu ta mara na e protocol. Pa e motibo ey CAft ta considera cu e fondo di crisisplan no ta cuadra cu normanan stipula di e protocol cu a ser firma dor di gobierno.

A sabiendo di e protocol e minister en cuestion a bin cu e fondo pa crisis social. Ta un lastima cu awor tin discusion y cu nos muchanan, nos hobennan y esunnan den dificultad no ta hayando e atencion necesario cu e minister a priminti nan. No ta na su luga cu nos muchanan ta ser uza den un bataya pa haya medionan pa nombra amigo y famianan. Nos muchanan, hobennan y famianan den dificultad no merece pa ser engaña. E efecto di e trabounan pa medio di crisisplan mester ser refleha den mas cooperacion entre instancianan, miho registracion, referencia di casonan y sincronisacion. Un victima di abuso y maltrato no lo ser yuda dor di un solo sesion di combersacion p’esey mes no ta realistico cu por elimina un lista di espera di 2 aña cu e minister a indica den tres luna.

Por gaña esunnan cu no a traha nunca den sector social, pero no por gaña Wyatt-Ras. P’esey mes ta un lastima cu e plan di zgn crisis aki no ta dunando e resultado priminti.