Parlamentario Mervin Wyatt-Ras(AVP) : ‘Ta inhumano cu te ainda tin ciudadano cu a perde trabou na maart ta wardando riba yudansa di FASE’

Den un comunicado Parlamentario, drs. Mervun Wyatt-Ras ta trece padilanti cu ta inhumano cu te ainda tin ciudadano cu a perde trabou desde maart relaciona cu COVID 19 ta wardando riba yudansa di FASE. Ta fresco den nos memoria con minister Glembert Croes a anuncia e proyecto di Fondo di Asistencia Social di Emergencia pa yuda esnan cu a perde trabou a consecuencia di COVID 19.

A publica diferente criteria cu mester cumpli cune pa por bin na remarca pa e ayudo aki. E aplicado mester tin un id/paspoort valido, permiso valido, ultimo payslip of ultimo 2 si ta cobra pa kinsena, carts di dunado di trabou firma, un cuenta bancario local riba nomber di e aplicado. E criterianan a cambia y a haci e proceso aki mas soepel segun e mandatario encarga cu Asuntonan Social y Labor. Alabes a amplia e criterianan di fase pa pensionado cu ta trahando 450,- y part-timer pa 450,-.

Segun por a tuma nota cu di 13.093 persona registra 11.730 persona a cobra pa april y mei locual ta suma na 11 miyon florin. Un cantidad di 1363 (10.4%) te ainda no a haya yudansa. Un grupo di persona a bay demostra na gobierno paso nan no por mas. Segun nan declaracion tin di nan cu e compania cu nan ta traha p’e lo a haya loonsubsidie. Sinembargo nan como trahado no a ricibi niun pago. Otro ta sali riba e lista di registracion di loonsubsidie cu supuestamente lo mester a cobra caba cual no a sosode nunca. Di otro banda tin hende cu ta na pia di trabou y si ta hayando ayudo di FASE mientras cu nan cu ta sin trabou den situacion preocupante no ta haya ayudo di ningun hende. Ora na yama na e number publica nan no ta haya contesta y no por acudi niun caminda pa haya un clarificacion of contesta. Documentonan ta perde of tin cu registra na mas di un ocasion y asina mes no ta haya ayudo.

Kiermen un bruhacion. Wyatt-Ras ta wordo acerca door di diferente persona cu no a haya nada y cu ta desespera. Nan tin cu paga awa y coriente y otro gastonan. Famia a yuda nan pero no por mas. Parlamento a reuni cu minister den comision fiho y a trece diferente preocupacion padilanti. Wyatt-Ras ta spera cu nos hendenan preocupa lo por haya oido. Sikiera e number di telefon asigna pa FASE por traha pa nos hendenan por haya sa kico a pasa cu nan peticion. E gobierno aki cu gaba di tin hende central mester cumpli cu su promesa y berdaderamente cuminsa pone nos ciudadanonan mas central.