Parlamentario Mervin Wyatt-Ras ta lamenta cu gobierno y specialmente minister di Enseñansa no ta sali na vanguardia di derecho di mucha. Den e siman aki maestronan a bin ta manifesta nan disgusto tur dia pa medio di cierto accionnan ludico na nan scolnan, manera p.e. pitra auto y tambe para dilanti scol cu pancarta.
Wyatt-Ras tabata presente na Scol Paso pa Futuro diaranson atardi pa sostene maestronan y mayornan. Minister di Enseñansa kier muda e scol aki sin tene cuenta cu e muchanan y nan necesidadnan. Na e edificio aki panort di Postkantoor tin lokaal pa traha obranan di man y tambe tin un cushina. E muchanan ta siña “life skills” pa man por defende nan mes miho den aspectonan social (sociale redzaamheid).
E muchanan ta special y no ta mashinnan cu por ser kita di aki pa pone aya. Nan no ta muchanan cu por cu cambio facilmente y nan mayornan lo mester bay hiba nan scol mas leu for di cas. Sspecialmente den e temporada dificil aki cu nos pais ta pasando aden esaki no ta aceptabel. E minister ta carece na comprension pa e muchanan y nan necesidadnan. E forma dictatorial con e minister kier saca e muchanan y maestronan
no ta husto. Kier core cu e muchanan di Paso pa Futuro. Manera por a compronde lo kier pone muchanan di Beatrixschool den e edificio mientras cu Beatrixschool su edificio te ainda no a ser drecha door di e gobierno aki.
Wyatt-Ras ta di opinion cu mester stop tur e cambionan cu e minister kier bin cune. E kier integra/fuse scolnan publico cu protestant sin tene cuenta cu e forma di pensa y religion di muchanan y nan mayornan. Tambe e kier introduci scol riba distancia sin tene cuenta cu posibilidadnan y debilidadnan di scolnan y mayornan cu no tin computer ni internet pa e muchanan. Aki e muchanan di menos recurso lo sufri e consecuencianan. Tambe e kier apertura di scolnan despues di COVID cu tur consecuencia cu esaki por tin cune pa loke ta trata higiena y salud si e muchanan.
Maestronan, docentenan, cabesantenan y sindicatonan SIMAR, SEPA y STA a demostra y entrega carta na gobierno y Parlamento. Durante un reunion publico cu e minister, fraccion di AVP a entrega un mocion di desconfiansa contra e minister, mientras coalicion a sostene e minister y entrega mocionnan pa sostene maneho di e minister. Despues Parlamento a reuni cu SIMAR cu a trece padilanti cu e minister no ta dialoga ni comunica cu nan. Un dado momento minister di Asuntonan General a anuncia cu e ta para tur cambio. Sinembargo minister Lampe a sigui cu loke el a bin ta haci y a bisa cu e lo dialoga tocante implementacion pero di cambionan cu el a anuncia. Esey kiermen cu nada lo par’e di sigui locual e kier logra.
Wyatt-Ras ta spera cu por considera derechonan di mucha dor di e gobierno aki cu a bisa cu p’e e hende lo ta central sinembargo mas y mas ta resulta cu hende no ta central pa e gobierno aki. Ta prefera di scapa e coalicion, cu no ta sincronisa nan maneho, y conserva nan posicion enbes di defende interes di enseñansa y nos muchanan.
