Segun Mervin Wyatt-Ras durante conferencia di prensa di fraccion tin hopi cambio cu minister di enseñansa ta anunciando y e cambionan aki ta “kort door de bocht” y sin dialogo cu maestronan/docentenan. Wyatt-Ras a trece esaki padilanti den un reunion di comision. Lamentablemente un reunion asina no ta publico. Segun Wyatt-Ras a cuestiona minister encuanto cambionan cu e kier bin cune. E parlamentario a ser acerca dor di diferente persona di veld, tanto maestronan como hoofdnan di scol y mayornan cu ta preocupa pasobra gobierno no ta dialoga ni comunica cu “veld”.

Lo bin cambionan pa loke ta trata e.o. organisacion, ideologia,filosofia y formanan di traha. Esakinan lo tin nan consecuencia ariba resultadonan di kico nos muchanan por realisa y kico nan por logra. Esey ta preocupa nos fraccion inmensamente, segun Wyatt-Ras. Pa loke ta trata e cambionan di organisacion minister kier fuse diferente scol cu diferente filosofia. Por ehempel Pieterboer school lo bay hunto cu scol protestant Graf van Zinzendorf bou auspicio di SPCOA, Abraham de Veerschool lo bay hunto cu John Wesley bou SPCOA, de Schakel hunto cu Colegio Arubano tambe bou un stichting nobo. E diferente filosofianan no ta cuadra cu otro. Pakico? Pasobra scolnan publico a wordo netamente lanta pa  haci e.o. posibel cu tur mucha por haya enseñansa. Esey ta un derecho hancra den nos constitucion y segun tratadonan internacional. Dor di filosofia of criteria di cierto scolnan den un fundacion muchanan sa wordo kita den pasado y por a plaats e muchanan aki bek na scol publico. Esey ta un gran bentaha di scolnan publico. Minister ke cambio di dia pa anochi, sin consulta cu esnan cu ta traha den e field y esaki ta inaceptabel. Banda di esey minister kier introduci siñamento ariba distancia. Pues muchanan no mester ta continuamente na scol y por sigui les na/via cas.  E kier introduci’e e.o. a base di Covid.

P.e. muchanan di bais lo haya les 2 dia den siman na scol y 3 dia na cas. Den e caso cu tin otro rumannan e muchanan cu no tin medionan audiovisual na cas, cu tin cu comparti computer cu otro, lo enfrenta dificultad si nan lesnan na cas ta mesun dia y ora. Esey ta si nan tin computer. Si nan no tin computer, nan no por sigui scol na distancia. Tin famia cu no tin ni internet. Pa e mayornan cu un djis lo bay traha lo ta dificil paso nan yiunan lo keda nan so na cas y lo no por guia nan cu scol via distancia. Banda di esey tambe tin e mayornan cu no tin e conocemento pa yuda nan yiu cu les. No paso nan no kier pero paso nan no por. Un otro situacion ta muchanan cu ta victima di violencia na cas. Pa e muchanan aki hopi biaha scol ta un luga “veilig”, un luga sigur unda nan por papia cu nan maestro. Na cas nan no tin esey. Nan sigur lo wordo perhudica. Parlamento a caba di aproba e presupuesto di crisis plan social cu ta inverti 18.6 miyon florin pa proteccion di nos muchanan. E cambionan aki di enseñansa riba distancia y na cas lo tin consecuencianan pa e muchanan aki.

Pa e hecho cu lo kita werksters foi trabou, kendenan ta esencial na e momentonan aki pa cu limpiesa di e scolnan cu lo habri, tin cu expresa palabranan di disgusto.
Ta di importancia pa scolnan cumpli cu condicionnan importante regardando higiena, segun protocolnan stipula dor di Departamento di Volksgezondheid. Wyatt-Ras tambe a haci minister preguntanan encuanto e protocolnan aki. Muchanan lo mester laba nan man continuamente, mester tin wasbaknan cu yapon, wc-nan den bon condicion, mester awa sea den watercooler of boternan awa pa mas higiena, handsanitizers etc.  Di tur esakinan por a tuma nota cu maestronan no a ser informa. A ser expresa caba cu e higiena mester ser regla prome cu scol por cuminsa. Pa asina evita cu por haya un brote di COVID 19 na scol. Esaki specialmente ora portanan habri pa bishitantenan di exterior. E diferente trahadonan cu nan futuro no ta conoci ainda ta invallers, klasseassistenten, prisma leerkrachten y trahadonan social cu ta cay bou DPS. Pues tin diferente insiguridad y preocupacion cu no ta wordo discuti cu e maestronan. Wyatt-Ras y su fraccion ta haya cu miembronan di e fraccionnan cu ta sostene gobierno, cu a para fuerte contra privatisacion di nos enseñansa, awor aki no ta papiando, no ta bisando nada y ta lagando minister haci kico e kier.
Segun Wyatt-Ras na e momento aki ta hopi importante pa nos tur para fuerte pasobra den Parlamento ta e luga unda nos por cuestiona gobierno pero nos fraccion a haci 9 intento pa haya un reunion publico cu minister. Minister te ainda no a bin parlamento pa e reunion aki. Presidente di Parlamento no ta yama e reunion, mientras cu niun miembro di coalicion ta cuestiona esey. Wyatt-Ras ta kere cu na e momento aki mester sinta na mesa. P’esey tambe e diferente maestronan y sindicatonan tambe ta bay subi caya pa expresa nan preocupacion. Wyatt-Ras ta spera cu e ministro Presidente no core bisa cu e ta bay cambia tur cos. Esey por a ripara cu ta e modus operandi den e gobierno aki. Niun hende no ta papia cu otro, no tin sincronisacion, nan no ta traha hunto. Nan ta pega un candela aki, bolbe pega un otro candela otro caminda y e ministro presidente ta core bin bisa e ta bay soluciona e asunto. Nos enseñansa ta esencial pa cada un di nos muchanan pa supera nan mes den nos comunidad. Pa nos por yega na un nivel halto y pa nos muchanan por haya oportunidad di bay studia afo ta di importancia bon calidad di enseñansa. Cu e cambionan aki sin ta bon planea na un dado momento lo perhudica nos muchanan y nos futuro generacion.
Maestronan, mayornan y nos fraccion no ta acepta e procede aki. Nos lo para hunto cu nan pa garantisa cu nos enseñansa ta duradero y pa futuro.