Recientemente prome cu tratamento relampago di presupuesto di pais Aruba dia 24 di maart ultimo, gobierno a anuncia cu lo lanta un Fondo pa Asistencia Social di Emergencia (FASE) cual lo por yuda 25.000 persona cu a perde trabou.

Sinembargo despues por a tuma nota di e minister encarga cu Asuntonan Social y Labor cu e personanan mester cumpli cu yen di rekisito y cu lo haya e suma priminti te na fin di april. Esaki a hinca hopi di nos ciudadanonan cu semper a traha duro durante oranan largo, specialmente esnan cu ta traha den turismo, den desesperacion completo. Nan tin cu warda full un luna pa haya un suma hopi menos di nan entrada mensual. A informa nan cu nan lo por haya si pakete di cuminda. Esaki no a cay den bon tera cerca tur esnan cu a keda sin nada y a haya un tiki speransa di por sobrevivi den e tempo venidero.

Aunke cu e suma aki mes no ta mucho hopi, saliendo for di ultimo cifranan di CBS. E cifranan di CBS ta indica cu un persona cu ta biba su so mester di Awg 2500,- pa luna pa por sobrevivi y un famia di tata, mama y dos yiu mester di 5000,- pa sobrevivi. Por conclui cu ta necesario mas yudansa pa yuda famianan cu ya caba dor di medidanan di e gobierno aki prome cu e Viruscrisis tabata strangula cu BBO cu a hisa tur prijs y impuestonan. Tambe lo mester stimula e dunadonan di trabou cu no a kita trahado pa asina nan por keda mantene nos hendenan na trabou y esnan cu a kita trahado pa purba coloca nan bek na trabou. Ademas mester traha ariba shelter pa esnan cu no tin dak ariba nan cabes y prepara pa ayudo psicosocial pa personanan cu lo wordo afecta emocionalmente.

Gobierno a bulldoze un apoderacion den Staten pa kier fia 1.3 biyon florin riba mercado internacional sin cu gobierno tin un plan concreto y sin ricibi sosten di Hulanda den esaki. Gobierno tambe a haci un peticion pa donacion di 400 miyon Euro na gobierno Hulandes. Sin embargo Hulanda a contesta negativo ariba tal peticion.

Awor no ta keda nada mas di bay den propio seno gubernamental pa baha propio gastonan. Por baha e cantidad di ministernan, baha compra di productonan di luho manera autonan caro, biahenan cu toch awor no por tuma luga, y fabornan pa friends and family. Ya caba nos como parlamentarionan a mustra cu ta willing pa entrega. Awor ta bay pa ministernan mustra di nan banda si nan kier entrega na nos pueblo. Ta den e temponan aki di crisis bo ta bay mira e berdadero cara di cada persona. Segun Wyatt-Ras ta necesario cu tin sosten pa DVG,  profesionalnan di cuido, cuerpo policial, ambulance, brandweer cu ta na frontline y tambe na esnan cu ta traha den tienda/supermercado y asuntonan psicosocial. Un tin cu yuda otro. Lo mester busca otro alternativa di haci negoshi. Nos no por keda sostene solamente riba turismo.

Ta p’esey mes Wyatt-Ras no por caba di compronde con gobierno kier pasa Parlamento un ”fastball” pa regala Citgo placa, mientras en realidad Citgo lo mester paga gobierno 310 miyon florin. Cu e suma aki hopi por ser haci den e temporada dificil aki. E hecho cu kier regala Citgo placa ta zona hopi raro y ta indica politikeria di marca mayor.  Wyatt-Ras ta spera cu e parlamentarionan di coalicion uni nan mes na fraccion di AVP pa no duna e machtiging aki na gobierno. Fraccionnan mester uni awor pa por yuda nos hendenan den necesidad.