Parlamentario Mervin Wyatt Ras: Minister demisionario no kier carga responsabilidad pa medidanan den cuido

Durante conferencia di prensa di fraccion di AVP, Parlamentario, drs. Mervin Wyatt-Ras a trece su preocupacion padilanti pa loke ta trata medidanan cu ta y lo keda introduci den cuido di salud. Diabierna venidero, dia 23 di juli 2021, aunke laat, lo trata presupuesto di aña 2021 di pais Aruba den Parlamento. Probablemente lo corta 60 miyon den e parti di cuido. 

Wyatt-Ras y su coleganan a tuma nota di un rapport di mei 2021 titula “zorg voor onze zorg” of cuido di nos cuido mei 2021. Den e rapport ta indica diferente medida, cu ta lo afecta nos pueblo te den su curason y higra. Ta ser menciona introduccion di sugar tax, cual lo bay afecta netamente nos ciudadanonan di menos recurso.

Tambe ta menciona un “eigenbijdrage” na spoedeisende Hulp (SEH) na momento cu un persona presenta na SEH y por constata cu e por a bay dokter di cas cu e keho aki. Den e caso aki e pashent lo mester paga 100 florin pa e wordo trata. Ademas ta menciona un “solidariteitsbelasting”.

Den e rapport ta conseha alabes pa introduci un “eigen risico” pa esunnan cu tin malesanan chronico. Esaki ta encera discriminacion di nos hendenan. Wyatt-Ras no ta kere cu esaki lo duna su frutonan. Segun Wyatt-Ras ta necesario programanan preventivo informativo y siña biba na un otro manera segun un “healthy lifestyle” y baha e prijs di fruta y berdura pa nos hendenan por come mas saludabel na prijs pagabel.

Reduccion di salario di trahadonan di hospital tambe ta den ta para manera por a compronde. No ta tende nada di e sindicato di trahadonan di hospital tocante di e punto aki, kisas lo bin otro palabracionnan cu hospital.

Wyatt-Ras no ta haya husto pa netamente esunnan cu ta traha den hospital cu den tempo di pandemia a traha asina duro durante oranan largo pa atende tur pashent na un forma cualitativo tin cu ricibi tal trato. E ta un bofta den nan cara.  Esaki mientras cu otro paisnan ta duna un bonus na trahadonan den hospital y stakeholders di salubridad.

Un otro medida cu ta ser menciona ta esun pa loke ta trata nos grandinan. Lo bay haci un calculacion di aña di bida cu ta keda di nos grandinan pa por duna nan un tratamento. Esaki ta un forma inhusto pa trata nos grandinan.

Banda di e rapport aki cu a ser entrega na gobierno tin e gobierno five wave model di AZV pa tuma medidanan den cuido. Contrario na e informacionnan aki Wyatt-Ras a scucha un entrevista cu e minister presidente demisionario, sra. Evelyn Wever-Croes, cu diripiente ta trece padilanti comosifuera cu e ta bay haci un plegaria na Hulanda pa no laga Aruba corta 60 miyon den cuido.

Esaki ta un cambio drastico di su forma di trece e asunto padilanti paso durante debatenan prome cu eleccion por a skuch’e trece padilanti cu hopi fervor cu e  landspaketten ta un hecho y ta un realidad y no por touch nan y cu mester ehecuta nan. Hunto cu n’e por a scucha e otro lidernan di partido trece padilanti cu nan lo ehecuta e landspakketten. Un excepcion ta lider di AVP, kende na varios ocasion a trece padilanti cu lo tin cu bay bek na mesa cu Hulanda y re negosha.

E ministro presidente demisionario a firma e landspakketnan cu Hulanda sin consulta ni cu gremionan sindical ni gremionan comercial y nos a haya nos mes cu un “voldongen feit”. Na e momento aki e ministro Presidente demisionario ta purba strooi santo den wowo di pueblo cu awor e ta bay haci un plegaria cerca Hulanda, mientras cu ya caba el a firma e landspakketnan. Tur hende a haya sa cu ta e mes a firma e paketenan di medida na momento cu stakeholders cu a manda carta pa  minister Knops pa desaproba e medidanan y a haya di e minister Hulandes como contesta cu Aruba mes a dicidi unda ta tuma e medidanan aki y no ta Hulanda ta dicidi den cual sector ta tuma e medidanan aki.

Ta gobierno di Aruba a tuma e decision aki di corta den cuido. Pesey e Minister presidente demisionario mester asumi su responsabilidad cu el a tuma e medidanan aki.

Un otro medida cu nos pueblo a ser confronta cun’e na maart di e aña aki ta esun di e lista positivo di remedinan di cual a kita un cantidad di remedi y haci e lista mas corto. Nos pueblo mester a paga pa e medicinanan cu no ta cay bou di e lista aki mas.

A ripara hopi confusion, lamento, disgusto y rabia den nos pueblo cu no tabata di acuerdo cu e cambio aki. Esunnan cu no por a paga pa e medicinanan aki a keda sin cumpra nan cu tur consecuencianan fatal pa nan salud. Dado momento den campaña politico gobierno a ripara esaki a core hala e medida aki aden. Por constata un biaha mas cu e minister presidente demisionario tampoco tin pensa di carga responsabilidad pa e medida aki. Den un entrevista e ta papia di un tipo di “vangnet di asistencia social pa yuda esunnan cu no por paga nan medicina paso nan no tin trabou of entrada.