Parlamentario Mervin Wyatt-Ras: Gobierno mester splica pueblo tocante landspaketten

Durante cu a trata presupuesto di pais Aruba di aña 2021 y Landsverordening Instelling Ministeries diabierna ultimo a sosode algo lamentable. E presidente di Parlamento sin tuma tempo a haci wega dor di cera e lista di orado sin duna e parlamentarionan, tin di nan nobo, oportunidad pa inscribi nan nomber pa papia. Esaki nunca bisto.

Ta trata di un presupuesto cu a ser manda pa Staten, 7 luna laat y a ser trata despues di 11 luna cu mester a drenta Parlamento. Esaki ta un falta di respet pa e instituto Parlamento. Durante e reunion tabatin werksters presente den tribuna, cu ta traha na SKOA, kendenan ta na vispera di perde nan pan pa por cria nan famia. Esaki ta un situacion inacceptabel. Wyatt-Ras a haci un apelacion na gobierno pa durante tratamento di e presupuesto concentra riba con por mantene nos hendenan na trabou. Esey ta un pregunta cu cada miembro di e constelacion mester contesta. Con e trahadonan di SKOA por mantene nan trabou. Tambe el a pidi pa haya contesta ariba preguntanan cu a haci pa loke ta trata e presupuesto. Un parti no a haya contesta den e “nota naar aanleiding van het verslag”. Fraccion a haci ademas “aanvullende vragen”.

Wyatt-Ras a trece padilanti cu nos pais a ser confronta cu COVID-19 dor di cual tin un presion hopi grandi no solamente riba nos situacion financiero-economico sino tambe riba nos salubridad, ensenjansa y asuntonan social. Pesey ta importante pa nos recupera. Nos mester rescata nos pais di e situacion aki y ta importante kico gobierno tin den taparra, paso manera Raad van Advies ta indica gobierno no a menciona nada di e landspaketten den presupuesto, siendo henter pueblo ta pendiente di e medidanan cu lo asota nos pais, saliendo for do e landspaketten. Wyatt-Ras a haci un apelacion na gobierno pa gobierno informa pueblo kico lo bai pasa y cu empleadonan publico? Ta bai bin e medida cu empleadonan publico mester entrega 20 % di nan salario? Si esey ta e caso gobierno mester informa nos hendenan pa nan sa kico ta warda nan. Preguntanan cu a wordo haci, mester haya contesta ariba nan. Tambe no ta fair con nos ta wordo trata. Segun Wyatt-Ras Presidente di Parlamento mester ta un Presidente pa tur hende den Parlamento, no pa un partido, ni pa un solo bandera politico.