Durante conferencia di prensa di partido y fraccion di AVP, drs. Mervin Wyatt-Ras a referi na lider di partido di AVP, parlamentario Mike Eman y e carta cu a ricibi, fecha dia 4 di maart 2022, di Raad van Bestuur di Hospital na su personal. Den e carta aki e personal ta ser informa cu e situacion di Hospital no ta pagable mas y cu lo mester corta den gasto of cu otro palabra tuma medida.

Segun Hospital gobierno no ta envolvi stakeholders prome cu tuma decision. Consecuentemente pa 2022 y proximo 5 aña lo sigui corta den e presupuesto di Hospital cu 5.5.%. AZV lo aplica indexering riba e lumpsum, locual ta trece cun’e 1.5 miyon florin di recorte. E eigenbijdrage lo conduci na cu Hospital no por bay duna e servicionan manera cu e ta desea, locual tin consecuencianan pa e patient. Paso na e momento cu un patient yega na porta di Spoedeisende Hulp y e no tin placa, e tin consecuencia cu si e ta wordo atendi of no. Na momento cu un patient yega cerca un specialista y e no tin e placa pa paga un eigenbijdrage e no lo wordo atendi. Tur esakinan tin efecto tambe ariba locual cu Hospital mes tambe ta bay ricibi como entrada y ta bay verhaal esey riba tur e otro condicionnan di trabou y beneficionan primario y secundario di trahadonan.

Ta importante pa tene den mente cu Hospital lo tin cu bay dicidi riba ki cuido ta bay duna si of no, cua vacatura por yena si of no of ki personal por busca si of no pa haci e trabou, pa loke ta trata e CAO y tambe con e organisacion di Hospital por bay sigui carga cu e gastonan y keda cu su trahadonan si of no. Esaki ta encera cu trahadonan lo por perde nan trabou, locual ta preocupante.

Nos ciudadanonan pa añanan tabata asegurado di AZV, cu a ser lanta na aña 2001. Cu tur e diferente problematica cu AZV por tabatin, esaki nunca a bay a costo di e patient. Na e momento aki bo ta haya un gobierno cu no ta consulta cu stakeholders y ta scoge pa tuma medida.

Wyatt-Ras ta menciona e carta cu e stakeholders a manda pa Parlamento, Ministerraad y AZV, fecha dia 11 di februari 2022 encuanto nan opinion tocante eigenbijdrage y den cual nan ta haci 25 pregunta na gobierno y ta bin hasta cu sugerencianan of alternativanan. Nan kier pa gobierno contesta nan. Sinembargo esaki no ta e caso.

Den e carta aki stakeholders ta trece padilanti cu e medida di eigenbijdrage lo crea klassezorg. Klassezorg ta ensera un cuido segun entrada of status. Esunnan cu tin placa y esunnan cu por afford’e por bay Specialista, por bay Botica, por bay haci test di Laboratorio, por bay Spoedeisende Hulp y por bay un Huisartensenpost. Kiermeen cu e eigenbijdrage lo crea discriminacion y division entre ciudadanonan.

Den pasado prome cu AZV nos tabatin un sistema di PPK. Wyatt-Ras ta corda e tempo ey tabatin hopi discusion y hopi critica ariba e sistema aki pa motibo cu friends and family tabata bin na remarca pa cuido sin cu nan tabatin derecho. Cu eigenbijdrage nos lo bay bek na e situacion ey y lo bay fortifica nepotismo.

Wyatt-Ras alabes a tuma nota di e preocupacion di stakeholders pa loke ta trata cobramento di e eigenbijdrage dor di nan mes. Aki por haya situacionnan cu na momento cu patientnan no por paga e suma rekeri por bin intercambio emocional, hasta di frustracion y agresion dor di esunnan cu no por paga.

Ademas cobramento na e luga di cuido ta trece cun’e cu mester tin un bon organisacion pa bay administra pago, lo mester tin swipe-machine, mester di un sistema di kassa bon hinca den otro y mester tin un sistema di control. Den caso no tin evaluacion of controle lo por haya fraude. Nos no mester bay mucho leu, por pensa riba fraude na DVG cu certificado di vacuna, caminda vacunanan a wordo duna a cambio di placa y cu a horta placa di turistanan cu a paga pa haci test di COVID na Airport. Por bisa cu si no introduci e eigenbijdrage na un forma adecuado no lo logra e efecto desea y di corta den gasto.

Banda di esey eigenbijdrage tin consecuencianan devastador pa e patient y pa nos pueblo. Nos pueblo cu ya no tin mucho placa den cartera dor di falta di empleo, costo di bida mas halto, problemanan financiero y di debe, tin cu bay paga tambe pa cuido. Dor di eigenbijdrage no lo cumpli tampoco cu tur e metanan bunita formula di SDG pa garantisa cuido accessible y di calidad. Ni AZV tampoco lo cumpli cu su meta principal di garantisa accesibilidad di cuido y proteccion di derecho di patient. Por bisa cu gobernacion di AVP si semper a garantisa cu na momento un ciudadano presenta e por haya cuido di immediato.

Di otro banda gobierno no ta serio. Gobierno a presenta presupuesto di anja 2022 super laat, esta luna pasa (22 feb 2022). Raad van Advies a tik gobierno atrobe op de vingers. CAft tambe a tik gobierno op de vingers como reaccion riba e presupuesto. Segun nos Constitucion gobierno mester entrega e presupuesto di e aña coriente na Parlamento no mas tardy cu dia 1 di september di e anja.

Den e presupuesto di aña 2022 por nota cu e gastonan di aña 2015 pa 2022 ta mas halto cu e añanan anterior, total 1.497.7 biyon florin. E post di goederen en diensten o sea gastonan operacional tambe a subi desde aña 2015 pa 2022. Na aña 2015 e gastonan aki tabata 181.9 miyon florin y na 2022 226.1 miyon florin.

Kiermeen gastonan di compra di material pa oficina, pago di biahenan y di autonan di luho, fiestanan cu gobierno tin, tur a subi. Por menciona cu e gobierno aki ta laga tur su friends and family haci uzo di auto di dienst, entre nan secretarianan, casa, hasta byside. Den e presupuesto por tuma nota cu gastonan di Personal tampoco no a baha, manera a wordo bisa. Raad van Advies ta puntra tambe kico a para di e contractanten di crisisplan, pasobra parlamento a aproba cierto contracten cu mester a wordo prolonga di diferente persona cu ta na crisisplan pero no sa mas detalles di esaki.

Kiermeen di un banda gobierno ta fiesta, baila carnaval , tene actividadnan festivo, biaha y keiro cu otro y favorece amigo y famianan, mientras di otro banda ta corta den nos hendenan.

Un Punto tambe cu den e presupuesto ta ser menciona ta e diferente Raadnan y organonan di conseho cu ta bay lanta nobo. Esaki mientras di otro banda tin cu austerisa. P.e. por menciona entre otro directoraat justitie, un dienst cu status sui generis den turismo, un buro pa sosten secretarial, supervision y implementation multidisciplinario, un directie encarga cu asuntonan di energia y un comision di conseho encuanto admision y expulsion.

Wyatt-Ras ta lamenta con e ministro presidente irresponsable a palabra cu Hulanda, sin consulta cu gremionan sincal ni comercial, pa corta den cuido y diferente area pa medio di Landspakketten. El a entrega nos autonomia na Hulanda.

Banda di medidanan den cuido lo introduci un BTW di 18%, prijs di gasoline, awa y coriente lo subi. Esaki lo tin un efecto grandi di inflation. Tambe nos muchanan mester bay paga mas pa bay skol. Esaki mientras mucha tin derecho riba enseñansa y nos tin leerplicht.

E medidanan y eigenbijdrage ta inacceptabel pa nos comunidad y pesey nos fraccion y partido ta protesta energicamente. Nos a manda carta tambe pa Presidente di Parlamento pidiendo un reunion pa trata e preocupacion di stakeholders den cuido. Sinembargo te cu awor e reunion aki no a tuma luga. Stakeholders tampoco no a haya contesta ariba nan preguntanan haci den nan carta fecha dia 11 di februari 2022 .

Segun Wyatt-Ras e gobierno aki ta uno inhumano, cu no tin pueblo central y no ta merece pa goberna nos pais. Wyatt-Ras ta kere cu nos pueblo mester lanta ariba na e momento aki. Tambe e veld di cuido, esunnan den enseñansa y tur esunnan cu ta den nos comunidad cu ta stima nos pais Aruba pa asina nos mustra nos malcontento pa stop e situacion aki pa nos por garantisa cu mañan nos yiunan por tin un bon futuro. Cu nos yiunan por tin un minor calidad di cuido, un minor comunidad y cu nos por sobrevivi riba nos pais Aruba, esta nos baranca Aruba cu nos ta stima asina hopi.