Na clausura di aña 2020 y entrada di 2021 Parlamentario Mervin Wyatt-Ras ta refleha. E aña cu ta cabando tabata un aña di reto riba tereno di salubridad, finanzas, economia y asuntonan social.
Desde januari 2020 drs. Wyatt-Ras den un conferencia di prensa a indica cu nos mester prepara nos mes pa un virus cu a ser inicialmente detecta na Wuhan China y cu a cuminsa traspasa fronteranan. Sinembargo Gobierno no tabatin oido pa cu esaki. Wyatt-Ras a entrega preguntanan na e minister encarga cu e cartera di Salubridad kende no a haci caso di e preguntanan, ni a contesta nan. Ta na maart di e aña aki na momento cu World Health Organisation a declara corinavirus y awor yama COVID 19 como pandemia, a bati alarma na Aruba y a core yama reunion den Parlamento pa constata e siguiente dia casonan na Aruba di Arubianonan cu tabata den exterior.
Despues di esaki Aruba a bay den un lockdown te 10 di juli. Dor di e contagio rapido y e cantidad grandi di casonan rond mundo, specialmente den paisnan cu nos tin contacto cu nan pa medio di turismo, manera e.o. Estados Unidos, Canada, Brazil, Colombia y Hulanda, e sector di turismo a ser afecta grandemente. Alabes tur otro ramo di industria a ser afecta, un mas cu otro, cu desempleo di mas o menos 37.000 ciudadano.
Segun Wyatt-Ras dor di tratadonan internacional y a base di acuerdonan di cooperacion firma dor di nos paisnan, e.o. na aña 2014, tabatin for di comienso bon intercambio y cooperacion den Reino cu RIVM, cu ta e focal point, pa atende cu malesanan contagioso. Na 2013 a pasa ley al respecto cu a haya algun adaptacion na aña 2019 pa por garantisa miho cooperacion segun reglamentacion entre paisnan den Reino.
Pa alivia e situacion riba tereno laboral y social a bin yudansa financiero di Hulanda limita via FASE banda di loonsubsidie di SVB. Alabes boluntarionan, entre otro di Fundacion pa nos Comunidad y Cruz Corra a bin padilanti pa atende cu esunnan cu no tin cuminda.
Sinembargo ayudo di Hulanda den Reino no a bin sin mas. Hulanda a mara esaki na diferente condicion y sin consulta cu Parlamento ni gremionan, gobierno a acepta tur e condicionnan, ya caba den mei, prome cu tur e otro paisnan den Reino. Despues gobierno a bulldoze cerca gremionan y Parlamento decisionnan cu ya el a tuma hunto cu Hulanda. Esaki lo encera varios medida riba lomba di nos pueblo. Medidanan ya a ser implementa, net den e sector mas afecta, cual ta esun di cuido.
Esaki dor di corta den entrada di dunadonan di cuido, stop transporte di patentnan di dialisis pa pone amigonan di e minister haci dicho transporte, kita pago di djente falso y trabou di dentista y limitacion den e lista positivo di medicinanan cu ta ser cubri dor di AZV. Mientrastanto gobierno no a presenta un vision pa maneho economico-social pa e tempo binidero. Tampoco a presenta un presupuesto pa 2021, mientras esaki, a base di nos Constitucion, mester a ser entrega na Parlamento dia 1 di september di e aña aki. Ademas casonan di COVID enbes di baha nan a subi mas ainda sin control.
Di parti di nos fraccion nos tabata willing pa corta den nos salario cu 25% pa yuda alivia e situacion doloroso cerca ciudadanonan y a logra convence tur fraccion di esaki den un amienda.
A pesar di e situacion penosorond di COVID tabatin discusion continuo entre ministernan di coalicion encuanto diferente topico pa cual nan no por a yega na otro. Asina e di dos miembro di coalicion, Sra. Lopez-Tromp a ser saca for di su ministerio y hasta for di su partido na un forma hopi mahos. E motibo ta paso el a cuminsa critica actonan contra integridad, manera cu e mes a yega di indica.
Den e asunto aki por menciona alabes e error constitucional dor di Presidente di Parlamento Thijsen, unda pueblo por a mira cu e no sa su trabou y ta partidista. Aki el a forsa votacion den Parlamento sin quorum. Miho bisa votacion sin tin suficiente parlamentario den sala. Aki a trata di su propio miembronan cu ni a coopera cun’e pa ta den sala durante votacion. Wyatt-Ras ta indica cu saliendo for di principionan Christian Democrata su partido lo ta solidario y para banda di esunnan den dificultad y lo salvaguardia derecho di ciudadanonan. Pa por prepara ariba e tareanan basa ariba e principionan di partido a organisa, hunto cu lider, diferente sesion di brainstorming cu actornan importante ariba diferente tereno tanto financiero, economico como salubridad, social y enseñansa.
A scucha alabes ki “young profesionals ta opina”. Di e forma aki partido ta prepara su mes prome cu inicio di campaña electoral na aña 2021. Sin duda aña 2021 lo habri full speed y cu fe y speransa lo inicia un aña cu potencial pa cambionan tanto riba diferente tereno como den resultado electoral. Drs. Wyatt-Ras kier gradici tur esunnan cu a coopera cu su persona y cu partido AVP pa haci posibel cu nos por a haya suficiente informacion pa por haci e trabou parlamentario manera mester ta, expresando loke ta biba den nos hogarnan y curason di nos pueblo. Palabra di sosten, aprecio y elogio ta bay na tur frontliners, esunnan cu ta traha den cuido, cu nos famianan, muchanan y esunnan cu problemanan di indole psikiatrico. Tambe palabranan di aprecio Ta bay pa tur boluntario. Un mester yuda otro pa nos por atende cu e futuro nos dilanti.
Netamente awor nos mester tin wowo pa esunnan den dificultad, esunnan cu por ta victima di maltrato y muchanan cu por ta victima di abuso. A pesar di miyones cu a ser inverti den Sociaal Crisisplan ta resulta cu gruponan vulnerable tog ta keda den peliger. Wyatt-Ras y su fraccion lo keda vigila e gruponan vulnerable den nos comunidad di cerca y lo sigui loke ta pasa na un forma critico cu interes di nos comunidad como prioridad. Ban spera cu den 2021 Aruba y henter mundo, por domina COVID, cu por tin cambio y nos por reconstrui nos pais. Bon aña na un y tur!
