ORANJESTAD – Parlamentario Mervin Wyatt-Ras a tuma nota di diferente caso di abuso sexual di menor den medionan di comunicacion. Ademas por constata cu cantidad di casonan ta aumentando.
Esun cu a shock comunidad mas hopi ta e abuso sexual di e nieto di 2 aña door di su welo. Den medionan social di comunicacion tin hopi discusion al respecto, preocupacion y critica. Ora cu e gobierno aki a sinta na november 2017 a tuma e caso di 2 ruman victima di abuso pa bisa cu tin un crisis y a bin cu un crisisplan. A haci comosifuera ta e gobierno aki ta bay salba tur mucha na Aruba y lo caba cu tur abuso y maltrato. Esaki no ta cuadra cu realidad. Paso netamente awor tin mas caso cu nunca. Segun Wyatt-Ras p’esey mes como politico tin cu pensa hopi bon prome cu papia.
Segun e parlamentario ta dor di e proceso di conscientisacion di gobierno anterior mas casonan y ta ser denuncia na autoridadnan y instancianan. Ta keda un reto sinembargo pa e famia entrega keho ora tin abuso. Ta keda un proceso cu nos mester traha riba dje pa haci e victima of mayor(nan)mas fuerte. Tin factornan cu ta haci cu esunnan rond di e victima hoben no ta duna keho. Manera dependencia financiero of dependencia emocional.
Recientemente nos a evalua e fondo social den presencia di e minister di Asuntonan Social den parlamento. Durante tratamento di e fondo fraccion di AVP a pone hopi enfasis pa evalua e fondo cada kwartaal pa wak unda placa di pueblo ta bay y pa sigura cu instancianan ta haya e suma cu a ser priminti na nan. Por a conclui cu diferente instancia no a haya placa cu nan a kere cu nan lo a ricibi. Tin instancia no a haya e suma dor cu nan mester cumpli cu cierto rekisito. Esaki no ta loke e minister a priminti, segun Wyatt-Ras. Esaki ta manera e output subsidi’e cu gobierno anterior a traha riba dje pa e diferente instancianan por cumpli cu ne y cu esunnan di e gobierno aki a rechasa. Awor por nota cu nan ta haci mescos pero ta dun’e un otro nomber.
E gobierno aki a priminti shelo y tera, pero awor ta exigi yen di cos prome cu e diferente instancia por haya loke a ser priminti na nan. Minister a informa parlamento cu solamente 12% di e placa di e fondo a ser uza y ya segun e a soluciona cantidad di problema p.e. wachtlijst di sociale zaken a baha di 6 luna pa 2 luna. Wachtlijst di Voogdijraad a baha y di Sostenemi lo baha completo na december di e aña aki. Segun e minister a mira un cambio hopi lihe. Kisas hasta lo resulta cu e placa cu a pone pa e plan ta mucho hopi. Wyatt-Ras y tambe otro personanan den comunidad ta constata cu a pesar di e suma halto pa atende cu e problemanan di abuso cu e cantidad di casonan ta sigui crece.
Kiermen bin cu un fondo no ta solucion? Den pueblo nos hendenan ta trece padilanti cu castigonan mester bira mas halto. Wyatt-Ras mes a traha riba ley di iniciativa y a aumenta strafnan y introduci boet den caso di zedendelicten. Tambe e Codigo Penal a ser cambia na 2013 y aproba den parlamento. Kiermen nos leynan ta posibilidad castigo halto, pero e castigonan cu Huesnan ta duna no ta suficiente halto en comparacion cu e consecuencianan grandi pa e victima. P.e. si tin castigo maximo di 12 aña pa violacion, hues ta duna 1 pa 3 aña. Aki mester wak si por bin cambio. E Consecuencianan pa e victima ta de por bida. Den cada fase di desaroyo di e victima lo surgi problema. E trauma ta grandi y specialmente ora ta trata mucha chikito e mucha no sa dicon e ta haya nachtmerries, tin angustia, miedo di tur cos of ora ta mas grandi e no por cera relacion duradero cu hende. Tur e consecuencianan aki por ta relata na abuso. E minister encarga cu Asuntonan General a priminti den campaña cu lo e introduci un ley di castigo minimo 5 regla di 6 minuut. Te awor aki nada ainda, mientras e tin 2 aña sinta.
E ta pia crusa, e no a haci nada, pa loke ta trata e asunto aki. E ministro di Asuntonan General a papia tambe di ombudsman. Na parlamento a bin cu ley di iniciativa. A presente na Parlamento y a haya sosten unanime pe. A keda falta cu mester a bin cambio den Staatsregeling hunto cu e ley. Esaki a tuma su tempo pero por mira cu den e gobierno aki cu a haci un sin fin di promesanan tambe no a manda e cambionan pa e ley keda aproba. Por cierto a tuma nota den prensa di un foto di ministro presidente hunto cu e kwartiermaker cu Parlamento a acerca. E keartiermaker ta esun cu tin cu naci tur trabou organisatorio, preparatorio pa instala e buro di ombudsman.
E minister di Asuntonan General a gana paso el a bisa den entrevista cu prensa cu ombudsman ta un proyecto di dje cu el a cuminsa 5 aña pasa caba ora e ta oposicion. Esaki ta un gran mentira. Ora nos tabata den e comision parlamentario pa traha riba e ley Wyatt-Ras no a mira Evelyn Wever Croes. E mester stop di gaña. E por djis bisa cu parlamento a traha riba e ley aki y mester bin cambio pa e ley aki por ser ehecuta y e mester manda e cambio den staatsregeling pa ser trata den parlamento. Wyatt-Ras ta menciona cu mester tene ombudsman ley di politica pa no bay nombra amigo y famia como ombudsman. Wyatt-Ras den pasado a presenta un mocion pa bin un ombudsman di mucha y ta di opinion cu netamente awor dicho ombudsman ta urgente. E ombudsman aki por ser acerca na momento cu e cliente no ta haya ordo for di instancianan pa garantisa servicio y reto continuo di instancianan. E momento di papia y haci bunita a pasa. Mester cuminsa pone man na obra.
