Parlamentario drs. Mervin Wyatt-Ras, hunto cu diferente coleganan di Aruba y en total 40 pais Latino Americano y di Caribe, a reuni na Havana pa debati encuanto diferente topico. Esaki den e comision di Equidad y Genero, Niñez y Hubentud den cuadro di Parlamento Latino Americano y di Caribe.
Wyatt-Ras den e comision di Equidad di Genero, Niñez y Hubentud a obtene informacion importante for di representante di Nacionnan Uni encuanto topiconan di paz, igualdad y violencia politico contra di hende muhe. Pronto lo tin un seminario pa loke ta trata reglamentacion, prevencion y sancion pa violencia contra hende muhe den politica. Specialmente den paisnan cu tin violencia en general leynan a ser pasa al respecto.
E paisnan cu ya tin proteccion contra violencia politico den nan leynan ta e.o. Argentina(2009), el Salvador (2011), Bolivia y Panama (2013), Paraguay (2016) y Ecuador, Uruguay (2018).
Aunke nos no ta admiti, tin violencia politico den nos region y hasta na Aruba, p.e. ora MEP a saca 2 miembro femenino for di nan seno djis pasobra nan a vota pa un ley, pa despues sigui cu acoso verbal di e miembronan saca den Parlamento. Wyatt-Ras a pasa den esaki, locual a haci’e mas fuerte como persona y politico.
Un otro topico importante cu a trata ta e ley di Grooming, esta acoso cibernetico y riba rednan social specialmente di mucha y hoben muhe. Pronto lo tin un forum pa trata e topico di siguridad cibernetico. Esaki ta un topico hopi actual mundialmente. Ta importante pa proteha specialmente nos hubentud contra malhechornan via internet. Nos mester busca formanan no solamente pa prevencion, sino tambe pa sancion. Durante e estadia, e delegacion a bishita entre otro un scol yama ‘“solidaridad con Panama’, den cual ta educa y trata muchanan cu discapacidad cognitivo y fisico. Tabata impresionante pa mira con cu medionan limita toch ta logra duna acogida, cuido, guia y enseñanza na hobennan special y ubica nan na trabou. Tin di nan hasta a bira dokter y abogado. Por bisa cu tabata 2 dia hopi fructifero di intercambio.
Sinembargo Wyatt-Ras tin cu señala cu un miembro di parlamento, cu e biaha aki no a bay den delegacion, esta Endy Croes di mala fe a gana den un conferencia di prensa cu Wyatt-Ras a participa na comision di enseñanza, mientras esaki no ta cuadra cu berdad. Si el a haci su huiswerk bon e lo a ripara cu Wyatt-Ras ta den comision di Equidad y genero. Croes alabes a tira na cara di Wyatt-Ras cu el a biaha mientras e ta critica ministernan. Esaki tampoco no ta cuadra cu realidad.
Pasobra no por compara e biahe di Parlamentarionan cu esun di ministernan. E biahe di Parlamentarionan, incluyendo Endy y Mervin ta limita na 2 te 3 biahe pa aña y ta transparente. Es decir tur hende cu subi decos por mira na unda cual parlamentario a biaha y pa cuanto dia, cu ta limita. Siendo cu e biahenan di ministernan di e gobernacion aki ta ilimita y caro.
Tin ministernan cu casi no ta na Aruba. Esey no ta Wyatt-Ras ta bisa. Esey ta nan mesun hendenan y votadonan ta keha. Ademas nan ta bay cu un cantidad di persona di nan bureau. Door cu Wyatt-Ras y su coleganan di fraccion a critica e ministernan, gobierno no ta mandando informacion Parlamento mas ora nan ta biaha, ni na unda ni cuanto dia. Contrario na biahenan di trabou di Parlamento y departamentonan di gobierno, e biahenan di ministernan a bira incontrolabel pa parlamento. Nan ta bay paisnan leu manera p.e. Estonia y Samoa, cu placa di pueblo. Esey no por. Pueblo mester sa unda su gobierno ta y kico e ta haci. Por mira cu Croes ta apoya esey en bes di cuestiona gobierno. Ta bisto pues cu Endy no ta compronde su trabou.
Croes ta bay mas leu ainda di critica biahenan personal di Wyatt-Ras. Wyatt-Ras, mescos cu mayoria Arubiano, ora di vacacion ta biaha, cu pago di su propio cartera y no di pueblo. Esey no ta hustifica cu ministernan por bay luganan leu riba custia di pueblo. Pero manera cos ta bay cu costo di bida halto y medida tras medida, djis aki ni nos hendenan, ni Wyatt-Ras, lo por bay cu vakantie mas. Endy Croes mester wak su mes y su gobierno y para banda di pueblo en bes di cuestiona otro cu si ta sali na defensa di nos pueblo.
