Aruba ta pasando den un desaroyo economico sumamente preocupante y mientras cu gabinete Wever Croes ta sigui insisti pa trata di convence pueblo cu tur cos ta ‘koek en ei,’ en realidad por mira cada bes e dolor den comunidad.

Lider di fraccion di AVP, sr Marlon Sneek a mustra cu no solamente den comunidad pero por mira tambe cu gremionan a cuminsa bin dilanti pa vocifera nan preocupacion grandi pa e situacion cu ta existi na e momentonan aki den e pais.

“Awe Aruba tin un gobierno caminda nos por a scucha nan ta bisa cu pa ocho aña cu nan tabata den oposicion nan tabatin e miho plannan, nan tabatin solucion pa tur problema mientras cu awe ni un presupuesto supletorio no por a wordo entrega ainda na Parlamento.
Faltando un par di dia mas prome cu Pasco, tur cos ta indica cu na Parlamento e trahadonan en todo caso, lo tin cu bin traha despues di Pasco pa motibo cu gobierno no a cumpli cu nan tarea.

Mester bisa cu pa nos cu ta Parlamentario esaki no ta un problema ya cu e ta deber di miembronan di parlamento pa traha ora cu esaki ta necesario pero trahadonan si awor tin cu bin bek bin traha pa falta di vision y boluntad di e actual gobierno.

Tur esaki pa motibo cu gobierno no a percura pa e presupuesto supletorio ta entrega na tempo, gobierno a core bin haci show cu ‘najaars rapportage’ cu no ta ni existi, bin haci show cu tur cos ta cla, cu tur cifra ta na ordo.

Sinembargo e presupuesto supletorio cu ta algo cu gobierno mester entrega na Parlamento pa asina Parlamento analisa kico e ta e cambionan cu gobierno a haci, unda gobierno a gasta placa sin autorisacion, pa na final di dia haya autorisacion ainda pa esaki, esaki ainda no ta ni entrega na Parlamento.

Nos ta lamenta esaki cu awe dia 17 di december, pues faltando 14 dia pa aña caba, sacando afo algun dia di fin di siman, casi no ta keda dianan mas pa di un forma responsabel atende cu e ley aki y no mester lubida cu esaki mester sosode den un forma responsabel tambe.

Gobierno no por bin un cuarto pa diesdos entrega un ley y ta ‘bulldoze’ esaki caminda ningun hende sa exactamente ta kico ta locual a pasa, kico ta locual a sosode.

Un banda nos por mira cu presupuesto supletorio no ta entrega y nos ta mira tambe cu presupuesto 2020, cu eigenlijk mester a wordo entrega na Parlamento dia prome di September, awe ainda no a yega Parlamento y tampoco ni a bay Raad van Advies.

Ningun hende tin un idea kico esaki ta bay bira caminda prome nos a tende un splicacion di gobierno cu ta companianan estatal ta bay paga pa no introduci ‘sugar tax’ y awe nos ta tende cu ta ‘deviezenprovisie’ ta bay paga pa no bin cu ‘sugar tax,’ y esaki ta di lamenta ya cu di tur forma cu gobierno kier haci esaki, ta pueblo lo ta esun cu ta bay paga esaki bek.

Ora cu nos mira cifranan cu Banco Central ta pronosticando, caminda nan ta bisa nos cu e GDP, e forecast pa loke ta e crecemento economico pa 2019, ta bay cay atras cu 0.7%.

Pues Banco Central a cambia su pronostico bisando cu nan pronostico inicial a bay 0.7% atras y nan ta informa tambe cu “the downward revision resolve mainly from weaker investment, expoert and consumption.”

Pues nan ta bisa gobierno cu no tin inversion manera mester ta pero awe nos ta tende cu gobierno ta bin cu un deviezenprovisie y corda bon cu un deviezenprovisie loke kiermen cu na momento cu e comerciante den gran mayoria of cualkier persona cu ta bay paga cu nan creditcard of bay y cumpra dollar, tin cu paga y esey ta bay haci tur cos mas caro.

Esey ta nifica cu automaticamente e productonan ta bay conoce un aumento atrobe, pues claramente otro medida contra pueblo pero nan ta crea e impresion cu uzando un palabra dificil cu ningun hende ta compronde, pero esaki ta nifica cu simplemente un dollar ta bay haya un balor di entre 1.95 cu 2 florin ta bay tin mester pa cumpra un dollar pa e comerciante ey por cumpra e camisa, e flanel, e juice, e lechi, e keshi, tur locual pueblo ta come y bebe, ta consumi, e comerciante tin cu bay paga mas pa esakinan pa e por trece pa Aruba, ya cu e dollar ta bay tin mas balor.

Esaki ta sin conta e efectonan cu esaki ta bay tin pa esunnan cu a haci un fiansa pa por a traha sea un edificio of bin cu un hotel y otronan, awe e inversion ey ta bay bira mas caro pa paga bek.

Tur esaki a motibo cu ora ta busca of cumpra producto den exterior, e persona tin mester di dollar pa haci esaki y prijs di dollar ta bay bira mas caro.

Esaki ta bay habri caminda pa speculacion, esunnan cu ta den e sector cu tin dollar ta bay haci cu no facilmente dollar ta bay bin den circulacion cu consecuencia cu e reserva di divisa tambe por bay core peliger.

Pues un gobierno cu ta hibando e pais aki na rand di desaster ya cu nan no tin idea di kico nan ta papia y awo ta purba gaña pueblo cu no ta bin cu sugar tax pero tur hende den comunidad tin cu bay paga pa e decision di bin cu deviezenprovisio,” Parlamentario Marlon Sneek a declara.