Parlamentario Marlon Sneek(AVP): ‘Prome Minister por tuma ehempel di kico ta integridad for di Richard Arends’

Den forma contundente lider di fraccion di AVP, sr Marlon Sneek, a mustra cu AVP ta sinti su mes sumamente orguyoso di tin un persona manera Richard Arends, den su seno y cu e ta forma parti di e fraccion berde y cu ta haci e fraccion fuerte cada bes cu mester bin dilanti.

“Nos ta lamenta cu un Prome Minister ta presta su mes pa e tipo di haci politica baho manera cu el a haci.

Nos ta lamenta cu un Prome Minister ta saca documentonan oficial for di un departamento y den e caso aki un compania estatal, pa duna su Parlamentarionan pa nan bin haci shisheria den Parlamento.

Pa nos esaki ta di condena, sigur ora cu abo ta e persona cu ta bisa cu integridad ta haci lo corecto hasta ora ningun hende ta mira, anto awe pueblo por mira ken e Prome Minister aki ta.

Awe nos ta mira cu e ta coy documento, zwaai cune pero ta lubida di bisa cu e persona a informa e accionista cu ta Pais Aruba y RdA: danki, pero cu su persona lo bay sirbi su pais.

Un persona cu tur hende cu conoce e salario di parlamentario- y ministernan, sa bon cla cu ta bay bo ta bay atras den entrada, pero ta e amor cu bo mester tin pa sirbi bo pais, esey ta pone cu toch bo ta tuma e reto aki.

Awe un persona manera Richard Arends, ta tuma un reto manera esaki, anto e Prome Minister kende mester ta e cara di e pais aki, e cara di su gobierno, ta presta su mes pa haci un tipo di politica bou di nivel manera esaki.

Pa AVP esaki ta di lamenta ya cu e documentonan cu Prome Minister tin cu saca, ta con den RdA awe, bo bufete representa dor di bo tata, ta e abogado di RdAy esey ta falta di integridad.

Ora abo como Prome Minister ta encarga cu cu un departamento, encarga cu un compania estatal, anto bo ta bira scoge bo propio tata, bo mesun bufete ya cu abo ta cobra dividendonan fin di aña.

E mesun dividendonan cu bo a cambia ley caminda no ta paga 25% mas di belasting pero 10% so, pa bo por haya mas y esey ta falta di integridad y mescos cu bo primo, ora cu a kit’e for di gobierno pa motibo di a falsifica diploma, abo como Prome Minister a dun’e un trabou den RdA, esey ta falta di integridad.

Anto nos ta lamenta cu e Prome Minister aki na luga di mustra grandesa y acerca oposicion y mira con hunto por hiba e pais aki dilanti, ya cu ta esey ta e situacion cu tin ya cu gobierno no tin conocemento ni capacidad pa atende cu e situacion cu tin, Prome Minister ta scoge pa bay hiba un politica barata, un politica bou di nivel, manera cu el a haci.

Claro cu nos no a spera nada otro di Evelyn Wever Croes, sigur no ora cu nos mira e lista di mentiranan cu el a gana eleccion cune, baha cantidad di biahe, baha cantidad di consehero, baha gastonan y lo scapa 50 miyon, muchanan no a bay paga schoolgeld mas, no ta bay paga parkeermeters mas, awe tur hende sa di e realidad cu e pais aki ta pasando aden

Pues un Prome Minister cu no tin cuero di cara, un hende cu a para den Parlamento y bisa cu portanan cu ta habri pa Evelyn Wever Croes, no ta habri pa Mikke Eman.

Awe despues di dos aña sinta riba e stoel di gobierno sin por concretisa e proyecto di refineria y esaki ta e Prome Minister cu nos tin,” lider di fraccion di AVP, Marlon Sneek a declara.

.