Lider di fraccion di AVP Marlon Sneek ta haya hopi baho di Minister di Enseñansa pa insinua cu maestronan ta laga nan mes wordo uza of guia door di partido politico den e campaña contra su persona.

El a bisa tambe cu e maestronan tin un sindicato cu ta representa nan tur den nan problemanan y di loke AVP a mira y scucha te awor, nan tin rason pa expresa nan preocupacionnan. E reunion cu fraccion di AVP a pidi riba e problemanan di entre otro mudansa di SPO y e problemanan na Traimerdia, a tuma luga diamars merdia. Pero pa nan sorpresa, e no tabata un reunion publico si ni un encuentro publico. E diferencia ta cu den un encuentro publico ta simplemente informacion ta wordo intercambia y ningun decision por ser tuma. “Den un reunion publico por duna direccion di kico Parlamento kier pa e Minister haci, por ehempel via di un mocion, pero awo nos por duna nos pensamentonan y e por simplemente pone nan un banda.”

A cuestiona e forma di manipula cu palabra di minister Lampe, kende ta bisa por ehempel cu SPO Sta Cruz ta keda intacto, pero na mesun momento ta bisa “nan no ta bay haya mucho nobo e aña aki”. Pues si e no ta bay haya studiante nobo mas, aki 4 aña e no ta existi mas, ya cu nan no a haya studiante nobo durante 4 aña, ya cu tur ta bay Brazil. “Kiermen toch di un manera sushi bo ta haci toch loke bo kier. Nos ta haya cu e mester ta sincero cu e maestronan y bisa cu e no ta kere den e proyecto y e ta bay par’e. Pero no bay gaña e hendenan otro cos y bisa cu ta nan no a compronde bo,” parlamentario Sneek hopi rabia a bisa.

Ta parce, e ta bisa, cu no por saca algo di berdad for di e minister, kende continuamente ta gaña. Asina por ehempel minister a bisa cu e noticia cu ta bay para e HAVO Lang-Project ta “fake news”, pero a bin descubri den documentonan durante e reunion di diaranson merdia uno firma di e minister cu e proyecto ey ta wordo para. “Con ami por confia bo ora cu bo ta bisa nos algo. Hasta cosnan cu ta riba papel, bo ta hala pa nan. Esaki ta un preocupacion hopi grandi cu e maestronan di scol tin.”

Asina Sneek a puntra tambe, si no ta bay acepta studiante mas na SPO Sta Cruz, kico ta bay pasa cu e maestro cu ta duna les den 1ste klas SPO. E ta laga e docentenan ey cu un incertidumbre total di loke ta su futuro. E mesun situacion aki ta mira na MDC, Tramerdia, Paso pa Futuro, etc. “Net awo prome cu bay cu vakantie, cu e maestronan mester ta trankil, e maestronan ta cabes yega cu e dolor di cabes di kico ta bay pasa cu nan.
Pa AVP e unico decision cu mester ser tuma aworaki ta pa e minister para tur decision y sinta na mesa cu e profesionalnan di e ramo aki.