Parlamentario, Marlon Sneek(AVP): ‘Gobierno no kier duna claridad riba su plan di recuperacion financiero y economico’

Ya for di luna di maart durante di reunion di Parlamento, lider di fraccion di AVP, Marlon Sneek a mustra cu e momento a yega pa gabinete Wever Croes duna Parlamento y pueblo den su totalidad, kico ta su plan pa recuperacion financiero y economico pa resto di 2020.

Segun Sneek gobierno no ta dunando indicacion kico ta su plan completo pa loke ta e proximo lunanan nos dilanti, con ta bay atende cu e situacion cu a presenta y kico ta e pasonan cu e lo tuma.

“No tin scenarionan ainda stipula con gabinete Wever Croes ta bay haci, si henter e maneho lo ta den fase y con lo ehecuta esaki manera kico tin cu haci den e proximo tres luna, kico tin cu haci den seis luna y kico nos mester y kico nos tin cu haci den nuebe luna.

Awe nos ta haya nos mes dilanti di un plan di gobierno cu ta papia di nuebe luna directo, manera cu no ta bay tin ningun recuperacion mas, manera cu no ta bay tin ningun entrada mas pa e pais aki, den e siguiente nuebe lunanan nos dilanti.

Esey ta lanta preocupacion grandi y nos ta sigui haci pregunta riba e documento cu nos a ricibi for di gobierno y nos ta puntra si esaki ta realistico?

E pregunta tabata si gobierno a discuti esaki caba den su contenido hunto cu Hulanda y kico esaki ta bay nifica, manera ki condicionnan tin mara na esaki, cu esaki lo bira parti di e RFT “Rijkswet Financiële Toezicht” ?

Gobierno di Hulanda a pone condicion pa duna Aruba espacio pa bay haci prestamo hunto cu nan? Y si esaki ta e caso nos lo kier informacion for di Gobierno si tin condicionnan mara na esaki y si tin kico e condicionan aki lo ta y si ta RFT lo ta un di e condicionnan cu ta riba mesa?

Mirando e cu carta di CAft cu ta ariba mesa nos mester conclui cu gobierno a mal informa Parlamento.”

E lider di fraccion di AVP tambe a mustra cu informacionnan cu a keda publica den medionan caminda cu CAft pa medio di su Presidente Raymond Gradus ta mustra cu e comision di supervision financiero ta sali di e punto di bista cu gabinete Wever Croes mester adapta e presupuesto 2020 na un scenario cu dentro di tres luna lo habri frontera bek y di e forma aki limita e deficit presupuestario y crecemento di e debe externo.

“Aki un biaha mas ta mustra cu gabinete Wever Croes no ta implementa loke semper el a propaga, esta di ta traha cu hopi transparencia, ya cu ta for di otro canalnan tin cu ricibi e tipo di informacion aki.

Parlamento mes no ta na altura ainda di un of otro carta di recomendacion di CAft na gobierno caminda ta sugeri un scenario totalmente diferente na loke gobierno a presenta na Parlamento mientras cu e ‘noodbegroting cu a wordo aproba pa fraccionnan cu ta sostene gobierno, ta papia di un lockdown di nuebe luna te cu final di 2020.

Aruba ta pasando den un situacion sumamente delicado, caminda ta rekeri esfuerso di tur instancia y persona envolvi, cual sin duda ta rekeri mas honestidad y mas transparencia di parti di gobierno.

E recomendacion nobo di CAft pa cu cambionan den presupuesto 2020, cu ta drentando awor, ta mustra cu keto bay tin e impresion cu gobierno di Hulanda ta sigui bisa gabinete Wever Croes no a cumpli cu palabracionnan concreto haci pa reduci gasto di personal.

Den e proceso awor pa haya ayudo financiero den e tempo dificil aki, Hulanda kier mira gabinete Croes cumpli cu palabracionnan serio haci den ultimo dos aña y mei,” lider di fraccion di AVP, Marlon Sneek a declara.