Documentonan a cuminsa drenta relaciona cu e forma con gabinete Wever-Croes ta funcionando y lider di fraccion di AVP, sr. Marlon Sneek a mustra cu postbus nan sa bin haya algun documento cu sigur ta importante pa pasa riba esakinan.

“Ora cu mi persona a dirigi algun pregunta na Prome Minister si su persona ta na altura di, den e caso aki di bufete di su tata, cual ta su bufete tambe, ya cu tin documento cu ta mustra cu su persona ta accionista den e bufete aki, sigur un Prome Minister cu ta papia di transparencia, awe nos por mira con su bufete ta strica placa bou un di diferente departamentonan y instancianan cu ta cay bou di maneho di e Prome Minister.

Pa nos esaki ta un tristesa, ya cu nos a kere cu e Prome Minister aki en berdad lo ‘walk su talk’ manera cu e mes ta bisa continuamente, bisando cu pa su persona integridad ta haci lo corecto hasta ora cu ningun hende ta mira pero nos por mira cu esaki no ta tumando luga cerca su persona.

Nos ta duda cu na Aruba no tin ningun otro bufete di abogado cu lo por atende cu cualkier caso pa gobierno cu no ta e bufete di Croes-Wever-Ruiz, cu lo ta e unico cu por haci e trabou aki pa gobierno.

Ora cu nos analisa algun di e cobransanan cu nos a haya den box tira, pasobra pueblo a cuminsa rabia, pueblo no ta acepta e tipo di cosnan aki mas, caminda e tipo di documentonan aki ta yega, nan ta percura pa nan yega cerca nos tambe.

Pa coy un specificacion chikito di locual a wordo cobra honorario, tin uno cu e fecha di 10 di april 2018 caminda un cobransa a wordo manda pa gobierno, relaciona cu consehonan huridico cu a wordo duna durante di un reunion entre Eman di RDA, abogado Ruiz y abogado Croes, relaciona cu preguntanan cu a wordo haci.

Loke ta impresionante sin duda ta e hecho cu e dos abogadonan aki, cu ta pertenece na mesun bufete den cual Prome Minister ta accionista, tanto abogado Ruiz como abogado Croes a manda cobransa di 2,000 florin pa e reunion cortico aki.

Esaki ta ehempel chikito di e stapel di documentonan cu nos a haya y aki tin di haber cu no solamente RDA, pero tin di tur e otro companianan estatal tambe, manera di WEB y Elmar.

Ta increibel con Prome Minister ta bisa cu e no sa di nada y den e documentonan ta wordo señala cu nan tabatin ‘overleg’ cu Prome Minister Evelyn Wever-Croes, caminda hasta a manda un ‘whatsapp’ y a cobra 100 florin pa manda esaki pa Prome Minister.

Esaki ta ehempel con ta strica placa di pueblo, door di manda whatsapp, a top’e den gang y a combersa un rato cune, e ta wordo cobra.

Pues practicamente tur rosea cu representantenan di e bufete aki hala, pueblo tin cu paga.

Nos por mira den e documento entre otro tambe un mail cu a wordo manda pa gobierno relaciona cu topico di conseho huridico, nan a cobra 175 florin.

Aruba tabatin un gobierno cu tabata garantisa prosperidad pa e comunidad aki, tabata garantisa proyectonan pa un desaroyo di e pais aki y awe e unico cos nos por mira ta medida tras di medida y nos por mira pakico medidanan ta wordo tuma, pasobra e placa tin cu bay na bufete di Papa.

Papa tin cu strica, ya cu esey ta e cos di mas importante y pueblo ta wordo laga pa su cuenta ya cu te dia di awe nos no por mira un proyecto di e gobierno aki cu realmente pueblo ta beneficia di dje.

Pa nos esaki ta di lamenta, pasobra awe ainda entre otro, San Nicolas ta wardando pa su MFA, caminda a wordo bisa cu lo bay pone placa ya cu supuestamente e placa a caba.

Nos a yega di mustra caba cu tanto MFA na Noord, MFA na Parandera y MFA na Savaneta, a costa un tiki mas ya cu mester a traha stacionamento adicional pero gobierno aki mester a pone solamente 200 mil florin mas den e pot pa e bario di San Nicolas haya su MFA.

Pero no, tin 200 mil florin mas pa manda pa Papa pero no tin 200 mil florin pa pone pa un MFA na San Nicolas y pa nos esey ta lamentabel, sigur ora cu nos mira cu no solamente no a traha e edificio di MFA, pero a bay over na corta diferente servicio, loke ta creando incomodidad pa pueblo di San Nicolas.

Esaki ta e gobierno cu ta pretende di pone e ser humano central, pero constantemente ta pone e ser humano un banda y esun cu ta bay central, ta Papa, esun cu ta bay central ta mesun Prome Minister ya cu ora e bufete aki gana placa, na fin di aña e Prome Minister aki tambe ta cobra su parti, ta cobra su dividendo cu e bufete aki ta gana.

Ta tristo con gobierno ta manda e unico persona sinta na San Nicolas pa duna servicio y kende tabata trahando c’un contract, a wordo manda cas y laga henter pueblo di San Nicolas sin ningun tipo di servicio,” Sneek a declara.