Amigo- y sponsornan di partido ta bin na prome luga y pa minister di infrastructura kende ta pretende di ta transparente, e ta haciendo cosnan totalmente for di sla y ta trata di manipula hasta parlamento den e proceso aki.

Uzando un miembro di su fraccion den Parlamento, minister ta trata di evita cu parlamento por analisa y studia su decisionnan cu el a tuma caminda e ta duna seis minuut na miembronan di parlamento, pa studia un total di 61 documento.

Tur esaki pa asina privilegia ‘brochi’ y sponsor di su partido, esta doño di partido y ta trata di hunga su weganan, tratado na manipula henter e proceso pa asina e por ‘get away’ cu cosnan cu no a cana bon.

“Pa motibo cu locual nos ta scuchando den comunidad, ya cu e minister aki no ta transparente, e no ta trece documentonan di e proyecto di dump na Barcadera pa nos wak y nos ta scuchando eyfo cu e minister a duna ‘opdracht’ pa cambia resultado di un destaho publico.

Ya cu tabatin un destaho publico, departamento di DOW a haci esaki y a manda bisa cu e compania A a gana e destaho y segun nos a compronde cu minister Oduber ta traha un carta riba e decision cu DOW a manda p’e, informando cu no ta bay cu compania A pero lo bay cu compania B pasobra den e oferta di e compania aki, no tin un incinerator hinca.

Ora cu wak e documentonan, ta poni cu e compania tin un incinerator hinca den su oferta pero simplemente e otro compania, ta un compania cu ta amigo di e minister anto nos kier pa minister Otmar Oduber ta transparente di berdad.

No transparente di boca pafo, paso nos a scucha cu AVP no tabata transparente, pero awor nos kier e minister ta transparente y manda nos e documentonan cu nos a manda pidi den nos carta.

E 61 documentonan aki cu minister Oduber a bin pone riba un mesa pa parlamento lesa den cinco minuut, manda nan pa nos pasa den nan manera mester ta.

Informacionnan cu nos ta hayando ta cu deliberadamente minister Oduber a scoge un otro compania cu NO a gana e destaho publico na prome instante y banda di esaki tin un compania cu tin un contract pa haci e trabou aki caba.

Pues ora cu minister Oduber a bay over na kibra e contract aki y e compania aki bay Corte loke ya caba nan ta den Corte contra di e minister y mirando con e caso ta hinca den otro, por anticipa cu minister ta bay perde e caso aki.
Anto ta bon pa bisa e minister pa e cuminsa prepara pa su persona bay paga e suma di 1.3 miyon florin ey di dos aña di contract ya cu deliberadamente el a bay cera un contract c’un compania pa un servicio cu gobierno tin un acuerdo riba dje caba.

Mesun cos e minister aki a haci cu DTI pa por a pone su amigo, apesar cu despues el a bisa cu ta un meneer Hulandes pero a bin resulta cu ta su ‘brochi’ e ta, cu kende e ta cana man den man y ta doño di partido, pa e edificio na Pos Chikito wordo gehuur pero aki Hues a bisa minister Oduber ‘absolutamente cu no.’

E proceso cu DTI a cana y e proceso cu e minister di e tempo ey a cana, tabata un proceso corecto anto minister Oduber mester respeta e contract ey y ora cu el a mira cu no tin caminda pa core, Oduber a inventa un dump na Pos Chikito caminda e por a hinca Serlimar eyden pa su amigo haya e contract di huur caminda e por cobra su 41 mil florin pa luna.
Tin cu bisa cu minister a haci e nechi, Serlimar ta paga un pida, Bureau City Inspector ta paga un pida pa pueblo no mira e cifra total, pa pueblo no mira e 41 mil florin pa luna cu e sponsor aki tin cu haya pa partido por sigui existi,” lider di fraccion di AVP, Marlon Sneek a declara.