Mediante un publicacion cu e parlamentario di partido MAS a haci riba su rednan social e ta cuestiona cu minister di Finansas, Xiomara Maduro no a bisa nada concreto den su contestanan y cu tin retraso den entrega di cuentanan anual di Pais Aruba.
Minister Maduro dia 31 di mei a señala cu e cifranan di ultimo kwartaal di 2023 tabata cla y nan a manda pa Parlamento pendiente e comentario di CAFT, pa e siman aki lo amplia den conferencia di prensa y mustra e resultado financiero di aña 2023.
Minister Maduro a contesta algun preguntanan cu Tromp a haci pero el a sigura e “promesa di e timeline pa entrega e cuentanan anual no a ser cumpli cune. Minister Maduro ta reacciona riba mi preguntanan bisando: ‘binnen niet te lange termijn’ Departamento di Finanzas lo ta capaz pa kita tur retraso y asina cumpli cu e promesanan haci.”
Na november di aña 2023 minister Maduro hunto cu director di Departamento di Finansa, Sr. Werleman, tabata na Contraloria General di Aruba conoci como Algemene Rekenkamer Aruba (ARA), pa haci entrega di e Cuenta Anual di Pais Aruba di aña 2019 na presidente di Colegio di Contraloria General di Aruba, Sr. Croes-Williams caminda e entrega a tuma luga den presencia di Secretario di ARA Sra. Curret y miembro di Colegio di ARA, Sr. Samson.
Minister Maduro e tempo ey, a splica cu e Cuenta Anual 2019 ta ser entrega cu retraso debi na varios factor. E cifranan di aña 2019 lo sirbi como base pa por yega na un declaracion di accountant pa e Cuenta Anual di aña 2026. Pa esaki trabounan di ‘nulmeting’ y tambe di ‘balanssanering’ mester a tuma luga den aña 2018 y 2019 prome cu por a bay over na compila e Cuenta Anual pa Aña 2019.
Banda di esaki e ‘lockdown’ den pandemia a trece retraso den e trabounan den aña 2020 y 2021. Mester menciona cu e impasse riba e aprobacion di e Cuentanan Anual di aña 2016 y aña 2017 pa Parlamento di Aruba, tambe a trece retraso grandi den e trabounan pa por a finalisa e Cuenta Anual di aña 2019. Por ultimo, e aplicacion riba cual e administracion financiero di Pais Aruba ta draai, GFS/EnterpriseOne, tambe mester a haya su ‘upgrade’ na comienso di aña 2023 y esaki a trece cune un retraso di algun luna.
Debi na e retraso aki e cual Tromp ta considera como “hopi largo” minister Maduro a aproba pa amplia e capacidad di Departamento di Finanzas y tambe di Centrale Accountantdienst pa loke Tromp a manda mas preguntanan back na e minister concerni, cu ta lo siguiente:
Por manda parlamento un timeline dentro di e cual esaki lo tuma luga?
Dicon ARA tin e jaarrekening 2019 pa mas cu 6 luna caba?
Minister a bisa cu nan falta capacidad internamente den Departamento di Finanzas y cu elimina retrasonan. Considerando esaki, e jaarrekening 2019 cu a ser traha door di su departamento of mester haci uitbesteding di e trabou aki sea completo of parcialmente? Si acaso e jaarrekening 2019 a ser uitbesteed, e compania cu a gana e destaho a cumpli cu exigencianan di Departamento di Finanzas pa cu e trabou haci? Cuenato esaki a costa y lo sigui traha cune?
Pa minister Maduro, esaki no a cay den bo tera caminda el a reaccion riba su Facebook page indicando “ta lamentabel cu e parlamentario den su preguntanan ta ataca un empleado publico cu ta haci su maximo esfuerso pa haci trabounan financiero na bienestar di Aruba. Nos ta sigur cu Marisol mes no tin ningun ‘verstand’ di e trabounan aki.”
