Recientemente Parlamentario Marisol Tromp, lider di fraccion di MAS, a publica un video riba TikTok den cual Tromp a enfatisa loke ex-Secretario di Estado Alexandra Van Huffelen a indica na Parlamento di Hulanda dos luna pasa.
Van Huffelen a informa Tweede Kamer via carta basa riba un investigacion, cu despues di tanto esfuerso haci, toch e maneho financiero di nos Minister di Finanzas Xiomara Maduro a keda zwak y cu tambe su entrega di rapportnan financiero pa duna cuenta cada kwartaal (uitvoeringsrapportage) na CAft ta hopi biaha laat, cual a bira un tendencia alarmante caba.
Y no ni papia mes riba e cuentanan anual di Pais Aruba di 2019 y bay ariba, cual tambe ta hopi laat y pues no a yega Parlamento ainda. Conforme ley di contabilidad, e rapportnan aki (jaarrekeningen) ta importante pa Parlamento por haci su debido control riba e gastonan haci versus loke a wordo presupuesta pa cada minister den cada aña. Cu otro palabra, asina nos por wak con placa di pueblo berdaderamente ta wordo gasta! Ademas Van Huffelen a indica a base di su investigacion cu e informacion den e rapportnan aki ta onvoldoende betrouwbaar, pues no confiabel, e parlamentario a comenta den un comunicado di prensa.
Pa su sorpresa, Parlamentario Tromp a ripara siman pasa cu e video di TikTok, den cual e parlamentario tabata splica e contenido di e carta di Van Huffelen na Tweede Kamer riba e maneho financiero zwak di Xiomara Maduro, a haya un advertencia di ‘Sensitive content’ y ‘Some people may find the video to be disturbing’. Aparentemente un hende lo a denuncia e video aki como uno cu tin un contenido hopi fastioso pa Gobierno. Obviamente e intento di censura aki simplemente lo haci e video lanta mas curiosidad, segun Tromp.
Pa colmo e siman aki e Minister di Finanzas a publica un articulo cu yen di fanfaria gabando cu e ta trempan cu e presupuesto di Pais Aruba pa otro aña, sin bisa ful e berdad di loke CAft a comenta den su ultimo carta riba e uitvoeringsrapportage di kwartaal 4 di 2023, cual tabata mas cu tres (3) luna laat, Tromp a nota. “Mescos cu e ciclo di duna cuenta riba gastonan haci no ta na tempo y ta keda na mita cu tur consecuencia negativo pa e trabao di e parlamentarionan, tambe Minister Maduro su capacidad pa maneha su departamentonan y conta pueblo ful e berdad ta keda na mita!”, Tromp a finalisa.
